O programa de conciliación diríxese a menores entre 3 e 12 anos || Realizarase nas instalacións do pavillón municipal e nos exteriores do CPI Camiño de Santiago entre as 8.00 e as 15.00h ||
20 de xuño de 2023
O Concello de O Pino fai pública a listaxe de nenas e nenos admitidos na Escola de Verán 2023 e a cantidade a ingresar polas datas de asistencia solicitadas, que pode descargarse premendo neste enlace. Todas as solicitudes accederon á praza por cumprir os requisitos sinalados nas bases.
O pagamento das cotas deberá facerse mediante ingreso en conta bancaria (ABANCA ES70 2080 0337 1131 1000 0078), especificando o nome da persoa usuaria e as datas de asistencia. O xustificante de pago deberá ser entregado nas dependencias do Concello ou a través da sede electrónica na data límite do 23/06/2023.
Aqueles proxenitores que renuncien á praza adxudicada deberán comunicalo, ben mediante escrito presentado na sede electrónica, ben presencialmente no rexistro do Concello de O Pino ou ben en calquera dos lugares previstos na lei de procedemento administrativo común das administracións públicas.
8 de xuño de 2023
O Concello de O Pino abriu a inscrición na Escola de Verán, que na súa edición de 2023 oferta 90 prazas en xullo, 70 en agosto e 50 en xuño e setembro para cubrir as necesidades de conciliación das familias do municipio. O programa diríxese a nenas e nenos de 3 a 12 anos e realizarase en seis quendas entre o 22 de xuño e o 8 de setembro. O prazo para anotarse finaliza o 19 de xuño.
A Escola de Verán 2023 contempla un total de seis quendas, adaptadas ao calendario escolar: do 22 ao 30 de xuño, a primeira quincena de xullo, a do 17 ao 31 de xullo, do 1 ao 14 de agosto, a segunda quincena de agosto e, ao fin, do 1 ao 8 de setembro. A actividade realizarase no pavillón municipal de Reboredo e nos exteriores do CPI Camiño de Santiago entre as 8.00 e as 15.00 horas, agás en días festivos, nos que non se ofertará o servizo.
O prezo da Escola de Verán é de 20 euros a quincena en xullo e agosto (40 € o mes completo) e de 10 euros as quendas de xuño e setembro. As familias numerosas terán un desconto do 20% a partir do segundo fillo, presentando o título de familia numerosa.
A data límite para inscribirse na Escola de Verán 2023 é o luns 19 de xuño. A solicitude de admisión realizarase mediante a ficha de inscrición, que pode descargarse nesta ligazón ou recollela nas dependencias municipais en horario de 9.00 a 14.00 horas. Unha vez cumprimentada, a ficha de inscrición presentarase na sede electrónica para o seu rexistro ou no propio Concello, xunto coa instancia que tamén se pode descargar na web municipal neste enlace e co resto de documentación que sinalan as bases.
No caso de que as solicitudes superen a dispoñibilidade de prazas, primaranse os seguintes criterios: empadroamento (cun mínimo de 3 meses de antigüidade); o criterio técnico das profesionais dos Servizos Sociais, en situacións especiais; familias monoparentais e monomarentais e unidades familiares con cargas nos coidados; menores escolarizados no Concello do Pino; que o pai, nai ou titor legal traballe no termo municipal; e participantes que estean gozando das súas vacacións no Pino. Os solicitantes non admitidos pasarán a formar parte dunha lista de agarda. No caso de que varios irmáns presenten a solicitude para a mesma quenda, a admisión dun deles suporá a admisión dos demais.
As cotas pagaranse unha vez que se saiba que o solicitante conta con praza, logo da publicación das listaxes de persoas admitidas no taboleiro de edictos e na páxina web do Concello. Nesta lista figurará a cantidade a abonar, xunto ás datas de asistencia. Unha vez efectuado o pago en ABANCA ES70 2080 0337 1131 1000 0078, presentarase o xustificante ben nas dependencias do Concello ou ben a través da sede electrónica antes do 23 de xuño.
