Mantéñense os obradoiros de memoria e de risoterapia nos locais sociais, así como bolillos e corte e confección na casa da cultura ||
Os menores poderán asistir a aula aberta, costura e bolillos ||
O Concello do Pino abre a inscrición para as actividades de lecer e culturais que desenvolverá durante este curso e que están dirixidas tanto a menores como a persoas adultas. As inscricións poden facerse na Casa da Cultura ou chamando ao teléfono 981 511 065. Os formularios de inscrición poderán descargarse nos arquivos adxuntos, que se topan ao final desta nova.
Este curso mantéñense no centro sociocultural Luis Seoane (casa da cultura) os obradoiros de bolillos e corte e confección, con sesións de 2 horas semanais para maiores de 6 anos. En costura pódese elixir entre quenda de mañá (os martes de 10.30 a 12.30 horas) ou de tarde (xoves, de 16.30 a 18.30 ou de 19.00 a 21.00 horas) por 25 euros mensuais. No caso de bolillos, as clases serán os mércores de 16.30 a 18.30 horas, cun custo de 35 euros mensuais.
As persoas interesadas poderán así mesmo poñerse ao día coas novas tecnoloxías nos cursos de informática, nos que poderán aprender a realizar os trámites administrativos máis habituais como pedir citas médicas, solicitar o permiso para unha queima, así como facer un documento ou enviar un correo. Estes cursos poderanse facer de mañá ou de tarde, segundo lles veña mellor ás persoas usuarias. O prezo é de 24 euros mensuais.
Para facilitar a participación de toda a veciñanza, nos locais sociais das parroquias ofértanse dúas actividades que tiveron grande aceptación nos últimos anos, como son os talleres de memoria (18 euros/mes) e de risoterapia (15 euros), que contribúen a fomentar as habilidades cognitivas e sociais ou reducir o estrés para impulsar un envellecemento activo.
Ademais dos cursos de corte e confección e bolillos, os nenos e nenas tamén poden participar na aula aberta, que se desenvolverá na biblioteca. Trátase espazo pensado para realizar actividades variadas como contacontos ou manualidades e desenvolverase os xoves de 17.00 a 19.00 horas. O custo é de 5 euros.
