Estivo organizado pola Federación EFAs de Galicia e forma parte do programa O eu Xacobeo ||
Nava Castro: “Con este programa queremos vincular o Camiño e os produtos do territorio, para promocionalos” ||
Manuel Taboada: “Estas xornadas seguen poñendo en valor o galo e a galiña piñeira” ||
Vincular o Camiño de Santiago e os produtos dos concellos polos que pasa é un dos obxectivos do programa Sabores e saberes do Camiño, que onte celebrou un showcooking na casa de cultura de Arca que foi inaugurado pola directora de Turismo de Galicia, Nava Castro; o alcalde do Pino, Manuel Taboada, e por Enrique Rodríguez, vicepresidente da Federación EFAs de Galicia, entidade que organiza este programa que forma parte de O teu Xacobeo.
As irmáns Cristina e Cecilia Sanmartín, do restaurante Casa Sanmartín de Lalín (que foi premio de gastronomía Galo de Curral) foron as encargadas de preparar as dúas elaboracións para enxalzar o galo e a galiña piñeira. Para esta ocasión elixiron unha receita tradicional e outra na que prepararon un trampantoxo de vieira con chacina de galo piñeiro.
Nava Castro salientou o importante papel que realizan proxectos como Sabores e Saberes do Camiño para por en valor os produtos e o seu territorio, e vinculalos co Camiño de Santiago. Enmarcada no programa O teu Xacobeo co que a Xunta busca diversificar e achegar a celebración do Xacobeo 21-22 a todo o territorio galego, o programa inclúe un total de 9 obradoiros de cociña en directo que se están a celebrar en diferentes puntos do Camiño de Santiago e para os que a Xunta de Galicia destinou unha axuda de algo máis de 11.000 euros.
“Xornadas coma esta serven para seguir a promocionar e poñer en valor o galo e a galiña piñeira e tamén o Camiño de Santiago ao seu paso polo Pino”, dixo o alcalde do Pino, Manuel Taboada, no acto inaugural desta xornada. O alcalde agradeceu a Turismo de Galicia e a Federación de EFAs que levaran esta xornada ata O Pino.
Dende a Federación de Escolas Familiares Agracias (EFAs) de Galicia, Enrique Rodríguez definiu a iniciativa Sabores e Saberes do Camiño como unha expresión do camiño no eido gastrocultural que permite descubrir os recursos do Camiño e os seus territorios, interactuar cos seus axentes e recompilar e documentar o seu saber facer.
“O galo para nós é un dos productos cárnicos galegos nos que se reflexa a calidade e a tradición da nosa terra. Seguindo a tradición preparamos o galo como se fixo sempre cunha receita que leva na nosa casa varias xeracións, e por outra banda faremos unha receita menos tradicional pero que permite un perfecto aproveitamento da peza de galo”, afirmou Cecilia Sanmartín.
O programa Sabores e Saberes do Camiño ten como finalidade o desenvolvemento das áreas rurais do Camiño de Santiago, a promoción da súa riqueza cultural, natural e humana a través de actividades de difusión da potencialidade gastrocultural nos Concellos de O Pino, Arzúa, Palas e Melide. Así recentemente nas instalación do centro de formación profesional Efa Piñeiral tiveron lugar as primeiras sesión do programa, co queixo D.O.P Arzúa-Ulloa e a mel como protagonistas de sendas accións. O proxecto continuará con obradoiros tematizados que terán lugar en Melide, Palas e Arzúa ó longo dos mes de maio.
