José González destaca que preto do 70% da superficie do concello está xa concentrada ||
A medida beneficia a 470 propietarios, que pasan a ter agora parcela cunha superficie media de 11.000 metros ||
O alcalde e Antonio Regueiro pídenlle ao conselleiro que concentre o monte das parroquias de Arca e de Pereira ||
O conselleiro de Medio Rural, José González, presidiu esta mañá o acto de entrega de títulos da concentración parcelaria de monte na parroquia de Budiño, que beneficia a 470 propietarios tras reorganizar unha superficie de case 700 hectáreas. A Xunta fixo un investimento nesta parcelaria de case 1,4 millóns de euros. O conselleiro destacou que preto do 70% da superficie do Pino está concentrada, tras rematar 12 parcelarias. O alcalde, Manuel Taboada, pediulle a José González que iniciase o antes posible a concentración de monte nas parroquias de Arca e de Pereira. Antonio Regueira, da Asociación de Veciños de Arca, entregoulle ao conselleiro máis de 200 firmas de propietarios solicitando o proceso.
No acto, no que tamén participaron a directora xeral de Desenvolvemento Rural, Inés Santé, e o alcalde, Manuel Taboada, o conselleiro sinalou que grazas a estes procesos mellórase a estrutura da propiedade, o que permite aumentar a base territorial das explotacións da zona e diminuír os seus custos de produción. Neste senso, José González sinalou que coa reorganización desta zona, pasouse de 4.983 predios a case 700 fincas, multiplicando case por oito a superficie media das parcelas resultante. Así, remarcou, pasouse de 1.400 m² a case 11.000 m² de superficie media por finca, o que evidencia a utilidade destes procesos.
A entrega de hoxe súmase ás xa realizadas nos concellos de Touro e Coristanco, na provincia da Coruña, de Riotorto e Castro de Rei, na de Lugo, e de Baltar, na de Ourense. Ademais, José González anunciou que nas vindeiras semanas seguiranse rematando máis procesos de concentración parcelaria, coa previsión de entregar outros 1.850 títulos de propiedade a 840 veciños.
Propietarios de Budiño citados ata o mércores
Para respectar as medidas de seguridade derivadas da covid-19 e ata o vindeiro mércores, os propietarios de Budiño están citado ao local social da parroquia a recoller os títulos segundo a aldea na que viven. Hoxe pasaron os residentes nas aldeas de Carolliño, Parañoa, Quintás e San Migueliño.
Mañá, martes, é a quenda dos propietarios de O Cruceiro, Fixo e A Fontaíña (de 10.00 a 11.00 horas); os de Pazos de Abaixo e Regodauga (de 11.00 a 12.00 horas) e os de Porta de Roxos e a Voutureira (de 12.00 a 13.00 horas).
O mércores, día 7, están citados os propietarios de O Campo (de 10.00 a 11.00 horas), Pazos de Arriba (11.00 a 12.00) e de Sar, O Couto e As Cancelas (de 12.00 a 13.00 horas).
Poderán recoller os títulos tanto os propietarios como calquera outra persoa que acuda na súa representación e que debe levar o seu DNI e unha autorización do propietario. O modelo pódese descargar no arquivo adxunto:
Parcelaria de Arca e de Pereira
Despois de estar en Budiño, José González e Inés Santé, visitaron a casa consistorial do Pino. Alí, o alcalde, Manuel Taboada, e Antonio Regueiro, en representación da Asociación de Veciños de Arca, entregáronlle ao conselleiro máis de 200 sinaturas de propietarios solicitando a concentración de monte da parroquia de Arca. Manuel Taboada tamén solicitou que se concentre o monte da parroquia de Pereira, que conta xa coa preceptiva declaración de impacto ambiental.
O conselleiro respondeu que estudiarán estas peticións e que tentarán atender estas peticións unha vez entre en vigor a futura Lei de recuperación da terra agraria de Galicia, arestora en tramitación no Parlamento galego e que debería aprobarse antes do verán.
A futura lei, segundo informa a Consellería de Medio Rural, permitirá axilizar os trámites e apostará tamén por instrumentos de mobilización voluntarios que permitan unha maior participación dos interesados na explotación das terras, como son os polígonos agroforestais, as agrupacións de xestión conxunta da terra, a iniciativa das aldeas modelo ou as permutas de especial interese agrario, entre outras.
