O Concello de O Pino promoveu durante este mes varias iniciativas coas que se involucra na loita contra o cancro de mama. Coincidindo coa celebración do Día Mundial da loita contra esta enfermidade, o consistorio realizou accións que van desde a edición de materiais solidarios ata a organización dunha charla formativa sobre a autoexploración mamaria. O obxectivo destas actuacións é, por unha banda, favorecer a concienciación e a solidariedade con quen padece este mal e, pola outra, mellorar a calidade de vida das afectadas e promover a detección precoz.
É o caso do taller de autoexploración que, a cargo de Rosario Rivas Mato, matrona do Centro de Saúde de O Pino, se celebrou o pasado mércores 24 de outubro. Rapazas de 4º curso da ESO do CPI Camiño de Santiago participaron neste curso, dunha hora de duración, realizado no centro sociocultural Luis Seoane. Rivas Mato impartiu unha conferencia con apoio audiovisual e logo unha parte práctica na que, mediante globos cheos de area, se fixo unha simulación da exploración mamaria, tan necesaria para a detección precoz do cancro de mama. Concienciar á poboación máis nova da transcendencia deste problema é unha das vías clave para mellorar a ratio de curación.
Por outra banda, o Concello de O Pino editou unha serie de chapas co lazo rosa, símbolo da loita contra o cancro de mama, e co lema ‘Concello O Pino. Sumámonos ao rosa’. Este material de sensibilización social foi repartido en diferentes actos celebrados no municipio, como por exemplo nas camiñadas do programa Camiña e Descubre, que comezou o pasado sábado.
Tamén se repite este ano o programa de reparto de “Almofadas do corazón” a mulleres afectadas polo cancro de mama e que sufriron a extirpación de vasos linfáticos na axila. Desde 2012, o Concello de O Pino facilita estes coxíns con forma de corazón, especialmente adaptados para persoas que sufriron esta patoloxía, xa que axudan a paliar as dores. As almofadas están feitas con produtos naturais, tanto no exterior coma no recheo. Poden conseguirse estas “Almofadas do Corazón” na Casa da Cultura, en Arca, ou solicitalas por teléfono no 981 511 065. O Concello do Pino facilitou tamén unidades deste material á Asociación Española Contra o Cancro en Santiago de Compostela, mostrando unha vez máis a sensibilización da veciñanza con este problema para cuxa erradicación a concienciación social é fundamental.
