A cita desenvolverase na tarde do sábado 28 e na mañá do domingo 29 de setembro ||
As inscricións deberán realizarse presencialmente na Casa do Concello ata o 27 de setembro ||
O Concello do Pino celebra as Xornadas familiares de corresponsabilidade os días 28 e 29 de setembro. Esta iniciativa forma parte do proxecto Escola de homes e familia, unha proposta financiada pola Consellería de Política Social e Igualdade e o Ministerio de Igualdad para o desenvolvemento do Plan Corresponsables. O seu obxectivo é fomentar e promover a igualdade de xénero e crear espazos onde as familias poidan reflexionar e practicar a repartición equitativa das tarefas domésticas e dos tempos de coidado.
Estas xornadas, que se desenvolverán ao longo de dous días, ofrecerán un programa variado de actividades orientadas tanto ao lecer como á aprendizaxe e á reflexión sobre a importancia de compartir responsabilidades non fogar. A programación está deseñada para que toda a familia poida participar e divertirse, á vez que se crea un espazo de sensibilización.
O sábado 28 de setembro as actividades comezarán ás 16:30 horas cunha xincana corresponsable e familiar, onde as persoas participantes deberán colaborar en diferentes probas, traballando en equipo e apoiándose mutuamente. A xornada continuará cunha actuación musical, a partir das 18:00 horas, a coa apertura do parque de inchables dende as 18:30 horas.
O domingo 29 de setembro a xornada comezará ás 10:00 horas cun doce almorzo de chocolate con churros, ofrecendo ás familias un momento para compartir e socializar. A continuación, ás 11:00 horas, organizase unha saída micolóxica, na que os asistentes poderán explorar a natureza e aprender sobre as variedades de setas da zona, fomentando así a actividade física en familia e o respecto polo medio ambiente. A cita concluirá ás 13:00 horas coa volta de recollida e unha degustación dos produtos atopados, xerando un espazo de convivencia.
As inscricións para participar nas Xornadas familiares de corresponsabilidade deberán realizarse presencialmente na Casa do Concello ata o 27 de setembro, en horario de 10:00 a 14:00 horas. Para aquelas persoas que necesiten máis información, o Concello pon a súa disposición o teléfono 981 511 002.
O formulario pode descargase no documento adxunto.
