-
O programa Conciliamos Viaxando está dirixido a escolares de entre 6 e 12 anos //
-
Os participantes poderán gozar de ata catro destinos diferentes //
O Concello do Pino pon en marcha Conciliamos Viaxando coa cativada do Pino, o programa co que a rapazada poderá desfrutar gratuitamente de diversas saídas durante o verán co obxectivo de facilitar a conciliación familiar e laboral no período das vacacións escolares.
O programa, dirixido ás nenas e aos nenos de entre 6 e 12 anos, consta dun total de oito excursións, que se levarán a cabo noutros tantos mércores dos meses de xullo, agosto e setembro. Terá preferencia a rapazada inscrita nalgunha das quendas do Lecer Verán así como a empadroada no Concello do Pino. Ademais, e co obxecto de que poidan gozar desta actividade o maior número de menores, os participantes non poderán repetir destino.
Estes destinos, aínda por concretar, serán un total de catro: a unha praia, a un parque de aventuras, a un espazo natural e a un acuario e un planetario.
As inscricións realizaranse ata o luns 15 de xullo cubrindo a formulario que se pode descargar na web do Pino ou recollelo de xeito presencial nas oficinas municipais de luns a venres en horario de 9.00 a 14.00 horas. No caso de que as solicitudes superen o número de 50 prazas dispoñibles, adxudicaranse por orde de inscrición en igualdade de condicións.
Este programa está financiado pola Consellería de Política Social e Igualdade e o Ministerio de Igualdad para o desenvolvemento do Plan Corresponsables.
As condicións do programa así como o formulario de inscrición poden descargarse nos arquivos adxuntos.
