A actividade terá lugar o 16 de maio cun percorrido polo Camiño Francés entre A Calzada e a Casa da Cultura ||
A participación é gratuíta, con prazas limitadas e inscrición previa obrigatoria ||
O Concello do Pino organiza o vindeiro sábado 16 de maio de 2026 a II Andaina das Letras: ‘Camiñando coa Lingua’, unha proposta que combina deporte, cultura e lingua galega nun percorrido polo histórico Camiño de Santiago ao seu paso polo municipio.
A iniciativa enmárcase na programación do Día das Letras Galegas e ten como obxectivo promover o uso da lingua galega a través dunha actividade participativa e aberta á veciñanza, ao tempo que se pon en valor o patrimonio natural e cultural do territorio
A xornada comezará cunha saída en autobús ás 8.30 horas desde o Centro Cultural Luís Seoane ata A Calzada (Arzúa), punto de inicio da andaina, prevista para as 9.00 horas. O percorrido, duns 13 quilómetros, rematará na Casa da Cultura do Pino arredor das 13.00 horas.
Durante o traxecto, as persoas participantes poderán gozar de diferentes intervencións dinamizadas polo guía turístico Carlos Guerra, que se desenvolverán en varios puntos do itinerario, ofrecendo unha visión amena da historia local e do propio Camiño de Santiago
A actividade está pensada para todos os públicos e busca tamén fomentar a participación en familia, promovendo o encontro interxeracional nun entorno natural e cultural de gran valor.
Inscricións
A participación na andaina é totalmente gratuíta, pero require inscrición previa antes do 13 de maio. As persoas interesadas poderán anotarse de xeito presencial nas oficinas municipais e no Rexistro municipal. As prazas son limitadas (35 participantes), polo que se cubrirán por orde de inscrición.
Desde o Concello do Pino anímase á veciñanza a participar nesta actividade, que busca reforzar o vínculo coa lingua e coa identidade cultural galega a través dunha experiencia compartida.
Podes descargar aquí o formulario de inscrición:
