A contía asignada pola Deputación da Coruña ascende a 5.236,20 euros || A axuda destinarase a financiar actividades que favorezan a participación social e o benestar das persoas maiores do municipio ||
O Concello do Pino é beneficiario dunha subvención outorgada pola Deputación da Coruña no marco do Programa de subvencións a concellos e outras entidades locais para financiar actividades de envellecemento activo e actuacións de loita contra a soidade non desexada no ano 2026. Esta achega está destinada a desenvolver iniciativas orientadas a mellorar a calidade de vida das persoas maiores do municipio e fomentar a súa participación activa na sociedade.
A contía asignada ao Concello do Pino ascende a 5.236,20 euros, unha axuda que permitirá financiar actividades municipais dirixidas a favorecer a integración social, o benestar e a autonomía das persoas de maior idade. O programa municipal de envellecemento activo inclúe propostas de lecer, formación e convivencia que contribúen a manter unha vida activa e a crear espazos de encontro entre a veciñanza.
Esta subvención permite reforzar o traballo que desenvolve o Concello do Pino para atender as necesidades da poboación maior e promover a súa participación na vida comunitaria. As actividades contribúen tamén a previr e combater a soidade non desexada, favorecendo as relacións sociais e os vínculos entre as persoas participantes.
O Concello do Pino continuará impulsando políticas e iniciativas que contribúan ao benestar das persoas maiores e á creación dun municipio inclusivo e sensible ás necesidades da súa veciñanza.
