A Deputación da Coruña, no marco da súa programación deportiva para 2025, organiza unha nova edición da Campaña de Neve na estación de Valgrande-Pajares. Esta iniciativa está dirixida a 600 rapaces e rapazas da provincia, entre os cales o Concello do Pino conta con 5 prazas asignadas na 6ª quenda, que se desenvolverá do 14 ao 17 de febreiro de 2025.
Das 7 solicitudes recibidas, 3 corresponden a rapaces e rapazas que nunca participaron nesta campaña e, conforme ás normas da Deputación, estas teñen prioridade e xa teñen praza asignada. As outras 4 solicitudes corresponden a participantes que xa asistiron en edicións anteriores e que entrarán no sorteo para as dúas prazas vacantes.
O sorteo terá lugar o próximo martes, 10 de decembro de 2024, ás 10.00 horas na Casa do Concello. Todas as persoas interesadas están convidadas a asistir. O procedemento do sorteo será o seguinte:
- Prepararanse catro sobres pechados e idénticos, un para cada participante.
- Os sobres serán introducidos nunha caixa ou recipiente e mesturados, garantindo que non se poida identificar o seu contido.
- A secretaria do Concello, como fedataria pública, seleccionará ao azar dous sobres. Os nomes nos sobres seleccionados corresponderán aos gañadores das prazas.
- Os dous sobres restantes determinarán, por orde de extracción, a lista de espera.
