O Pavillón de Reboredo acollerá exhibicións de sete disciplinas deportivas e a tradicional entrega de medallas ao alumnado ||
Futbol Sala nivel II
O Concello do Pino celebrará mañá venres, 5 de xuño, a gala de clausura das Escolas Deportivas Municipais 2025-2026, unha cita xa consolidada no calendario deportivo local que servirá para poñer o broche final a un curso marcado pola participación, a aprendizaxe e a práctica deportiva entre a infancia e a mocidade do municipio.
O acto terá lugar ás 17.30 horas no Pavillón Municipal de Reboredo e reunirá aos preto de 150 nenos e nenas, con idades comprendidas entre os 4 e os 16 anos, que ao longo do curso formaron parte das distintas actividades promovidas polo Concello.
A xornada estará protagonizada polos propios participantes, que ofrecerán exhibicións das disciplinas nas que estiveron traballando durante os últimos meses. O público poderá gozar de demostracións de psicomotricidade, multideporte, fútbol sala, ximnasia rítmica, baile moderno, patinaxe e bádminton, amosando a evolución, as habilidades e o esforzo desenvolvidos durante a tempada.
A gala contará coa presenza do alcalde do Pino, Manuel Taboada, e do concelleiro de Deportes, Borja Castro, e incluirá a tradicional entrega de medallas, un recoñecemento simbólico co que o Concello quere premiar a constancia, a dedicación e o compromiso de todos os nenos e nenas que participaron nas Escolas Deportivas Municipais.
Desde o Concello do Pino destacan a importancia deste programa, que cada ano contribúe a fomentar hábitos de vida saudables, a práctica deportiva e valores como o compañeirismo, o respecto e a superación persoal entre os máis novos.
A clausura servirá ademais como punto de encontro para as familias, os monitores e os participantes, que compartirán unha tarde de celebración tras meses de adestramentos, aprendizaxe e convivencia.
O Concello do Pino convida á veciñanza a asistir a esta gala e acompañar aos mozos e mozas deportistas nunha xornada pensada para recoñecer o seu esforzo e celebrar os logros acadados ao longo do curso.
