O programa está pensado para facilitar a conciliación familiar durante as vacacións||
A iniciativa desenvolverase entre o 22 de xuño e o 8 de setembro nas instalacións do Pavillón Municipal e do CPI Camiño de Santiago, en Arca ||
O Concello do Pino abre o prazo de inscrición da actividade Escola de Verán 2026, unha iniciativa impulsada pola Concellería de Muller e Benestar Social co obxectivo de facilitar a conciliación da vida laboral e familiar durante o período estival.
O programa está dirixido a nenos e nenas de entre 3 e 12 anos e desenvolverase desde o 22 de xuño ata o 8 de setembro, coincidindo co calendario escolar do curso 2026/2027. As actividades levaranse a cabo nas instalacións do Pavillón Municipal e nos exteriores do CPI Camiño de Santiago, na localidade de Arca (O Pedrouzo).
A Escola de Verán estrutúrase en diferentes quendas, de luns a venres, en horario de 8.00 a 15.00 horas. As quendas serán as seguintes:
- Xuño: do 22 ao 30
- Primeira quenda: do 1 ao 15 de xullo
- Segunda quenda: do 16 ao 31 de xullo
- Terceira quenda: do 1 ao 15 de agosto
- Cuarta quenda: do 16 ao 31 de agosto
- Setembro: do 1 ao 8
O programa ofertará un total de 105 prazas no mes de xullo, 86 no mes de agosto e 70 nas quendas de xuño e setembro. Para que a actividade se leve a cabo será necesario contar cun mínimo de dez solicitudes.
No caso de que a demanda supere o número de prazas dispoñibles, estableceranse criterios de prioridade, entre os que se atopan o empadroamento no Concello do Pino, a situación laboral activa ou de busca de emprego dos proxenitores, a escolarización en centros educativos do municipio e a renda per cápita familiar. Tamén se dará prioridade a colectivos como familias monoparentais, vítimas de violencia de xénero, persoas con discapacidade ou familias en situación de vulnerabilidade social.
Inscricións e pago ata o 17 de xuño
As persoas interesadas poderán formalizar a súa inscrición ata o 17 de xuño de 2026. A documentación poderá recollerse nas dependencias municipais en horario de 9.00 a 14.00 horas ou descargarse directamente desde a web municipal do Concello do Pino.
Os prezos establecidos serán de 30 euros por quincena e 60 euros o mes completo nas quendas de xullo e agosto. No caso das quendas de xuño e setembro, o custe será de 15 euros. Ademais, as familias numerosas contarán cun desconto do 20 % a partir do segundo fillo inscrito.
O pagamento deberá realizarse antes do 17 de xuño na conta habilitada polo Concello (ABANCA) ES70 2080 0337 1131 1000 0078) e o xustificante deberá entregarse xunto coa solicitude, preferentemente a través da sede electrónica municipal.
A listaxe de persoas admitidas publicarase no taboleiro de anuncios e na páxina web do Concello do Pino. As solicitudes que non obteñan praza pasarán automaticamente a formar parte dunha lista de agarda.
O Concello do Pino continúa apostando por iniciativas que faciliten a conciliación das familias e ofrezan aos nenos e nenas do municipio un verán activo, educativo e cheo de experiencias compartidas.
O programa está financiado pola Consellería de Política Social e Igualdade e polo Ministerio de Igualdade no marco do Plan Corresponsables.
Consulta as bases e os formularios de inscrición premendo neste enlace.
