O Concello de O Pino celebrará o domingo 23 de febreiro ás 17:30 horas o XXII Concurso de Disfraces de Entroido. A actividade terá lugar na Praza do Concello e estará aberta para todas as persoas que queiran participar. Os únicos requisitos para formar parte do certame son ir disfrazado e anotarse na Praza do Concello o mesmo día do concurso, a partir das 16:30 horas, aínda que tamén haberá inscrición previa.
Os premios desta edición alcanzan máis de 1.7000 euros e repartiranse entre as seguintes categorías: infantil (150 e 100 € para os dous primeiros clasificados), máis orixinal (150 €), individual (150 €), parella (175 €), grupo (250 €), carroza (300 €) e comparsa (500 €).
Os gañadores serán designados por un xurado composto por persoas alleas ao Concello de O Pino. No caso das comparsas e grupos, o xurado valorará vestiario e maquillaxe (que sexa un traballo feito a man e que empreguen materiais de refugallo); a orixinalidade; a organización do traballo en equipo; e que involucren ao público. Os criterios de valoración para os disfraces individuais serán tamén a orixinalidade do vestiario, a maquillaxe e involucrar ao público.
Todos os menores de 12 anos terán un agasallo se van disfrazados, figuran inscritos no concurso e desfilan polo escenario. As comparsas deberán estar compostas por un mínimo de 10 persoas representando un mesmo motivo; os grupos poderán estar formados por entre 3 e 9 persoas e as carrozas por un mínimo de 4 representando algún motivo enriba dun móbil.
As bases do concurso pódense consultar no documento adxunto a esta nova. Tamén se pode descargar a ficha de inscrición e a autorización a menores, que deberá entregarse asinada polo pai, nai ou titor/a.
Gañadores do concurso de carteis
Por outra banda, os traballos gañadores do concurso de carteis de Entroido organizado polo Concello de O Pino entre o alumnado do municipio ilustrarán o cartel do XXII Concurso de Disfraces. O certame vai dirixido a nenos e nenas de 3 a 17 anos empadroados no Concello, repartidos en catro categorías segundo a idade. O prazo para participar remata o venres 31 de xaneiro.
