O vindeiro 1 de xullo arrincarán as actividades da Escola de Verán 2020, un programa impulsado polo departamento de Servizos Sociais que pretende ocupar o tempo de lecer dos nenos e nenas de 3 a 12 anos e favorecer a conciliación familiar e laboral. O servizo desenvolverase nos meses de xullo, agosto e setembro no CPI Camiño de Santiago e noutras instalacións municipais próximas, como o polideportivo municipal ou o centro sociocultural; así como en lugares ao aire libre do concello do Pino. Os prazos de inscrición abrirán o venres 19 de xuño.
Este ano, por mor das circunstancias provocadas pola pandemia da Covid-19, a posta en marcha deste servizo e as súas condicións estarán condicionadas polas ordes establecidas polas autoridades competentes en cada momento. Para beneficiarse desta iniciativa, terán preferencia as familias empadroadas no Pino e tamén as que xustifiquen a necesidade de conciliar ou que formen parte de colectivos desfavorecidos.
A Escola de Verán desenvolverase de luns a venres en horario de mañá, de 8.30 a 14.30 horas. O Concello estableceu cinco quendas, que van do 1 ao 15 de xullo, do 16 ao 31 de xullo, do 1 ao 15 de agosto, do 17 ao 31 de agosto e, por último, do 1 de setembro ata o inicio do curso escolar. Para anotarse nas dúas primeiras quendas o prazo de inscrición vai do 19 ao 26 de xuño. Máis adiante, do 1 ao 20 de xullo, formalizaranse as inscricións para as quendas de agosto; mentres que os interesados en participar en setembro deberán anotarse entre o 3 e o 21 de agosto. As inscricións realizaranse no Concello de O Pino en horario de 10 a 14 h.
As bases da Escola de Verán 2020 poden consultarse no documento anexo. Para máis información, no teléfono 981 511 002 (Servizos Sociais) ou no enderezo electrónico cruz.toande@opino.gal.
Bases da Escola de Verán 2020
