- Exposicións, talleres formativos e charlas conforman a oferta do 25N //
- No Centro Luis Seoane se proxectará ata o 26 de novembro o documental “Chicas nuevas 24 horas” //
Cincuenta e un alumnos e alumnas do CPI Camiño de Santiago visitaron a exposición Chicas nuevas 24H na casa da cultura de O Pino, que está acompañada dun taller formativo dirixido á rapazada, está baseada no documental homónimo da directora Mabel Alonso e que denuncia o negocio da explotación sexual á costa de mulleres e nenas. Esta actividade é a punta de lanza programación que o Concello do Pino desenvolve este mes de novembro para visibilizar o 25N, Día Internacional da eliminación da violencia contra a muller.
Esta exposición pódese visitar ata o 20 de novembro no centro sociocultural Luis Seoane de 10.00 a 16.30 horas de luns a venres. O documental poderase visionar ata o 26 de novembro.
O Concello, dentro da actividade denominada Lentes violetas, organiza dúas charlas para o alumnado do CPI Camiño de Santiago impartidas pola cooperativa de educación Aventeira. Falarmos bonito: ferramentas para a comunicación asertiva, trato dende a non violencia e ética dos coidados está dirixida ao alumnado de sexto de primaria. Pola súa banda, o alumnado de cuarto de ESO abordará o tema da pornografía e as relacións de poder na ponencia Porno-sotrxs. Sexualidade libre e corresponsable: ferramentas para identificar o poder nas relacións afectivas e facer unha lectura crítica da pornografía mainstream.
O 30 de novembro, a partir das 17.00 horas, celebrarase no centro sociocultural Luis Seoane o coloquio sobre Submisión química e lei orgánica de garantía integral da liberdade sexual. Esta actividade está dirixida tanto a adolescentes como a pais e nais co obxectivo de coñecer esta forma de agresión, os seus efectos e como responder ante ela.
