-
As persoas beneficiarias poderán gozar de cinco sesións no circuíto lúdico termal Acquaform de Cuntis
-
As saídas faranse os días 15, 22, e 29 de maio e 5 e 12 de xuño ás 16.30 horas
-
O prezo é de 70 euros e inclúe o desprazamento gratuíto en autobús
O Concello do Pino promove un ano máis un dos programas máis demandados por parte da veciñanza: Vai de Auga. Esta iniciativa, que une as vantaxes terapéuticas das augas termais coa oportunidade de estreitar lazos e socializar, facilita o desprazamento semanal das persoas do municipio a un balneario.
Como en anteriores edicións, as persoas beneficiarias gozarán de ata cinco sesións no Acquaform Termas de Cuntis con saída dende a Praza do Concello todos os mércores entre o 15 e 29 de maio, así como 5 e 12 de xuño.
O prezo do programa é de 70 euros e inclúe tanto as sesións termais como o desprazamento de ida e volta gratuíto grazas ao financiamento do Concello do Pino. O autobús partirá ás 16.30 horas da Praza do Concello e regresará ao remate da sesión.
As persoas interesadas en recibir información sobre o programa Vai de auga poden chamar á Casa da Cultura ao número de teléfono 981 511 065. A reserva de prazas e a inscrición levarase a caso no rexistro do Concello.
As prazas son limitadas e cubriranse por rigoroso orde de inscrición.
No caso de que se apunten menores deberán estar supervisados por unha persoa adulta.
Cabe recordar que na edición de 2023 uns corenta veciños e veciñas do municipio participaron neste programa. Entre os aspectos que máis agradecen os usuarios e usuarias de Vai de Auga están tanto as vantaxes terapéuticas para moitas das súas doenzas como a posibilidade de manter unha vida un pouco máis activa.
A ficha de inscrición e o número de conta bancaria para facer o ingreso figuran no documento adxunto.
