Amtega remitiulle unha listaxe de 63 lugares nos que rematará a instalación de banda larga este ano ||
Manuel Taboada reclamaralle agora a Xunta e Goberno central que inclúan ao resto de núcleos na próxima convocatoria ||
O alcalde do Pino, Manuel Taboada, vaille pedir a Xunta, Goberno central e operadoras que axilicen a chegada da fibra óptica aos 71 núcleos de poboación que quedan excluídos do Plan de banda larga 2020 da Xunta e do Programa de extensión de banda larga de nova xeración da administración xeral do Estado, que se teñen que acabar de acometer ao longo deste ano 2021.
A Axencia para a Modernización Tecnolóxica de Galicia (Amtega) contestou ao escrito que o rexedor lle enviou a pasada mesma semana para saber cantos núcleos de poboación do Pino ían contar coa banda larga este ano.
Especifica o informe de Antega que os lugares de Amarelle e Bugalleira contan xa co servizo grazas ao Plan de Banda Larga 2020 da Xunta de Galicia e relaciona outros 63 núcleos beneficiarios das subvencións contempladas no Programa de Extensión da Banda Larga de Nova Xeración, dependente do Goberno central, que remata o 31 de decembro.
Sen embargo, quedan fóra destes plans un total de 71 núcleos do Pino, motivo polo que o alcalde esixirá agora que sexan incluídos sen falta na próxima convocatoria, de xeito que toda a veciñanza do municipio poida dispór dunha conexión a internet de altas prestacións o máis axiña posible.
Os núcleos excluídos dos programas actuais e para os que o Concello vai solicitar a conexión son os que se relacionan a continuación en cada unhas das parroquias do municipio:
- Arca: O Burgo, Outeiro, Picón e Samil.
- Budiño: Porta de Roxos, A Fontaíña, A Voutureira, As Cancelas, Carolliño, Fixó, O Couto, O Campo, O Cruceiro, Parañoa, Pazos de Arriba, Pazos de Abaixo, Regodauga e San Migueliño
- Cebreiro: Casal e O Pazo
- Castrofeito: Rial, Samil, Tixoliño e A Figueiroa.
- Cerceda: O Vilar, Vilarmeao e San Miguel
- Gonzar: A Igrexa, Cabanelas, O Carballiño, Os Castriños, Gonzar, O Lameiro, Rabal de Arriba e San Gregorio
- Lardeiros: A Igrexa, Casacuberta, Domés, O Casal, Pereirameá, Piñeiro, Pulleira e Vilaseco
- Medín: Cabaleiros, Cerdeira, Cimadevila, Setas, Sobrado e O Porto Outeiro.
- Pereira: A Igrexa, O Ameneiral e O Castro.
- O Pino: Vermás e O Vento
- San Breixo: A Igrexa, A Torre, O Casal, Lengüelle e Outeiro
- San Mamede: A Igrexa, Aquelavila, Calle, Frechazo Primeiro, Frechazo Último, Margaride, O Vilar, Rourís
- Pastor: Barcia, A Pena, Ponte Carreira, Ombre, A Igrexa, Liñares, Gándara, Currás, Casanova e Fonteseca.
