- A celebración, na praza do Concello, rematou coa peza de narración oral ‘O Apalpador conta con vós”
Despois de acender as luces a semana pasada, O Pino deulle a benvida ao Nadal este sábado 16 cunha gran festa familiar na que houbo obradoiros, xogos, espectáculos ou chocolatada, e que contou co ir e vir de numeroso público.
Unha carpa instalada na praza do Concello foi o escenario da celebración da quinta edición da Festa do Nadal, onde pequenos e maiores se sorprenderon co disparador de confeti e tiveron a oportunidade de elaborar os seus propios adornos de Nadal participando en distintos obradoiros con temática vencelladas a estas festas.
A diversión puxérona a música e os xogos en familia. Ademais, e como peche dunha entretida tarde, as persoas asistentes puideron desfrutar do espectáculo ‘O Apalpador conta con vós’, unha peza de narración oral a cargo de Caxoto Contacontos que espertou o interese da cativada ao desvelar cal é a ocupación desta personaxe mítica da tradición galega e, sobre todo, descubrir os consellos que hai que seguir para que neste Nadal nos deixe unha presada de castañas e algún dos agasallos que el mesmo constrúe.
Tamén tivo moito éxito o posto de lambetadas, doces e chocolate instalado polo alumnado de 4º da ESO do CPI Camiño de Santiago coa fin de recadar fondos para a excursión de fin de curso.
Podes consultar as fotos desta xornada tan especial na páxina de Facebook do Concello de O Pino premendo nesta ligazón.
