Algo máis de medio cento de veciñas e veciños de O Pino, empezaron hoxe diante do Concello de Sobrado dos Monxes a quinta edición de Camiña e Descubre, que este ano ten por obxectivo coñecer un pouco máis o Camiño do Norte a Santiago, na súa variante pola localidade arzuana da Mota.En total 54 persoas, con bastante xente nova, encheron o autobús contratado polo Concello de O Pino para viaxar ata Sobrado. Dende alí, a primeira hora da mañá, empezaron a descubrir e coñecer un pouco máis o tramo do Camiño do Norte que chega ata A Mota. Aquí rematan cun xantar esta primeira etapa, duns 19 quilómetros.
O vindeiro mes de novembro, o sábado 17, farase a segunda etapa, dende A Monta ata Santiso, en Castrofeito, e o 15 de decembro completarase o Camiña e Descubre co tramo entre Santigo y Santiago de Compostela.
Na edición de 2017, máis de 50 persoas andaron 140 dos 200 quilómetros de que consta o Camiño do Norte, comezando en Ribadeo. Este ano optouse pola variante da Mota, a antiga vía que unía o Mosteiro de Sobrado dos Monxes con Compostela e conflúe coa Vía Francesa en Lavacolla, seguindo o itinerario da vía romana XIX que conectaba Lucus Augusti e Iria Flavia. Este Camiño transcorre polo termo municipal do Pino polas parroquias de Santo Estevo de Medín, Santa María de Gonzar e Santa María de Castrofeito.
Para anotarse na actividade Camiña e Descubre hai que reservar praza chamando ao 981 511 065 ou enviando un correo a cultura@opino.gal
. O prezo é de 8€ por persoa. As andainas celébranse o terceiro sábado de cada mes, aínda que as datas poden sufrir cambios.
. O prezo é de 8€ por persoa. As andainas celébranse o terceiro sábado de cada mes, aínda que as datas poden sufrir cambios.
Camiña e Descubre comezou hai xa un lustro coa intención de dar a coñecer as diferentes Rutas Xacobeas, percorrendo en cada xornada unha media de 20 quilómetros para compartir experiencias e bos momentos. Moitos dos participantes levan formando parte da acción desde o principio, aínda que o grupo se renova e medra con cada convocatoria.
