A pianista Marina Fernández puido cumprir o pasado sábado, 24 de outubro, o seu soño de actuar ante os seus veciños no centro sociocultural Luís Seoane. “Foi un concerto moi especial porque O Pino é a miña segunda casa. E, ademais, tiven a inmensa fortuna de compartir escenario con Ilona Timchenko, a miña profesora particular desde que cheguei a Galicia”, destacou.
Unidas pola súa paixón polo piano, as casualidades da vida levaron a que alumna e profesora compartan tamén agora a condición de residentes no Pino. Marina, nacida na localidade salmantina de Béjar, chegou á parroquia de San Miguel de Cerceda hai catorce anos, cando o seu pai, de Touro, decidiu regresar a casa. Pasado o tempo, foi Ilona Timchenko quen resolveu deixar Compostela para fixar o seu domicilio en Castrofeito.
O sábado, nun centro sociocultural que completou o aforo e no que se respectaron escrupulosamente as medidas de seguridade marcadas polo covid-19, Ilona e Marina interpretaron ao piano un programa composto por pezas do compositor húngaro Franz Liszt.
O concerto enmarcouse dentro do Festival Peregrinos Musicales, do que Ilona é fundadora e directora artística. Marina Fernández, pola súa parte, goza na actualidade dunha bolsa de dous anos na prestixiosa Schola Cantorum de París co profesor Maurizio Moretti.
