Manoele de Felisa levou onte ata O Pino o seu último traballo, no que recolle poemas relacionados coa Ruta Xacobea. No seu particular Cancioneiro do Camiño figuran “18 cantigas, 18 historias que convén ser cantadas e contadas”, como el mesmo dixo na presentación do concerto. Trátase de poemas dos textos de dezaoito escritores cos que o cantautor nado en Cuntis narra as historias tradicionais que aparecen neste disco e que onte interpretou con maestría.
Ata o auditorio municipal achegáronse veciños e veciñas do Pino, pero tamén mozos e mozas de Logroño, Ourense ou da illa da Palma que participan na expedición El Camino de los Valores en apoio aos habitantes da illa canaria na que o volcán Cumbre Vieja está facendo estragos.
O concerto puido celebrarse onte, despois de varios aprazamentos no último ano debido á pandemia da covid-19. Para presentar o segundo tema desta concerto, o Alalá de Fisterra, Manoele de Felisa dixo que o Cancioneiro do Camiño conta a historia do Camiño de Santiago con música. “E a primeira historia que lle aconteceu ao Apóstolo Santiago a súa chegada a Galicia hai moitos séculos, cando pasaba por unha baixada de moral, foi cando se lle apareceu a Virxe María en Muxía”, onde hoxe se atopa a igrexa da Virxe da Barca.
E así, canción a canción, Manoele de Felisa foi cantando onte poemas de diversos escritores galegos como Fina Casalderrei, Xosé Luna, Armando Requeixo, Rosalía Morlán ou Henrique Neira, entre outros.
