FAÍSCA [nº16/2024]

Mellorando os servizos a toda a veciñanza

Bo Nadal, veciñas e veciños.

Un ano máis poñemos nas túas máns a revista FAÍSCA para compartir contigo unha parte do traballo que desenvolvemos dende o equipo de goberno durante os últimos doce meses. A través destas páxinas, e para ser fieis ao noso compromiso de transparencia contigo e con toda a veciñanza do municipio, infórmote dos proxectos que imos executando e poñendo en marcha.

Uns proxectos que este ano que está a piques de rematar estiveron encamiñados a mellorar os servizos que dende o Concello prestamos á veciñanza. É o caso da extensión da rede de fibra óptica ás casas que non tiñan conexión a internet, como ocorre na maioría da parroquia de Pastor. Fixemos un investimento superior aos 80.000 euros colocando os postes necesarios para que durante o primeiro trimestre do 2025, a empresa Rede Aberta (en base ao convenio asinado co Concello) achegue a fibra óptica a todos os fogares que non tiñan acceso a internet, para que poidan contratar coa operadora que consideren convinte unha conexión de calidade, como nas cidades.

As dúas casas do maior que acondicionamos nas antigas escolas unitarias de Lardeiros e Boavista (San Breixo) teñen como obxectivo poder atender preto dos seus fogares en cada centro a cinco persoas de 60 anos ou máis. Este servizo será prestado por unha persoa autónoma, ou unha coperativa de traballo social. Ademais da proximidade á casa das persoas usuarias, este é un servizo gratuíto, e dende o Concello estamos dispostos a habilitar máis edificios para instalar unha casa do maior nas parroquias nas que haxa demanda suficiente. Por estes motivos descartamos o centro de día, pero seguimos facendo xestións para construír unha residencia da terceira idade, para darlle unha alternativa a aquelas persoas maiores que queiran seguir vivindo cerca das súas casas cando non poidan valerse por sí mesmas.

Estes son dous dos proxectos que estamos a desenvolver para mellorar a calidade de vida da veciñanza. Como o son, tamén, os programas de conciliación familiar dirixidos aos escolares durante as vacacións, aos que este ano sumamos a iniciativa Viaxando coa cativada, para amosarlles fermosos lugares de Galicia. O mesmo ocorre con Camiña e Descubre, que atrae incluso a xentes doutros concellos da contorna, coa Ximnasia por parroquias, e mesmo cos programa de estimulación cognitiva ou as actividades socioculturais e deportivas que temos en marcha.

Unha amplia oferta que complementamos con melloras nas infraestruturas, como a nova depuradora de Arca, a ampliación de sendas peonís ou a inminente reposición de beirarrúas en Arca, sen esquecernos de loubar o traballo de todas aquelas persoas que tanto fixeron polo progreso do Pino. Por iso homenaxeamos a Manuel Barreiro Mosquera, quen lle da nome a nova Casa da Música, e seguiremos facendo o recoñecemento aos nosos maiores na súa festa anual.

Todos estes logros son froito dun traballo colectivo e do apoio que nos brindades. Agardo que poidas gozar destas festas en compañía dos teus seres queridos. Feliz Nadal e venturoso Anivovo.

Manuel Taboada Vigo
Alcalde de O Pino