FAÍSCA [nº14/2022]

Un municipio atractivo para vivir

Bo Nadal, veciñas e veciños:

Unha vez máis volvemos facer balance do traballo realizado nos últimos doce meses e que podes ver resumido neste número da revista Faísca. Neste ano de paulatina volta á normalidade, fomos recuperando algunhas das iniciativas tradicionalmente máis demandadas por persoas de diferentes idades. Puidémolo ver coa afluencia aos programas de conciliación durante as vacacións escolares, con máis de 150 nenas e nenos matrículados na Escola de Verán; coas actividades que desenvolvemos xunto coa escola unitaria de Gonzar; ou coa matrícula na Galiña Azul. Unha escola infantil que, polo seu bo facer, a Xunta de Galicia escolleu tanto para pechar o curso 2021-2022 como para comezar o actual 2022-2023. As propostas para a xente nova tiveron o seu cumio en setembro na Festa O Papaventos (louvada por moitas persoas de municipios da contorna) e que complementamos coas axudas á natalidade, das que este ano se beneficiaron 17 familias.

Neste 2022 tampouco nos esquecemos da mocidade, para a que organizamos diferentes xornadas formativas, conscientes de que eles e elas tamén son responsables de construír unha sociedade máis igualitaria. A oferta cultural, de ocio e deportiva que lles ofrecemos dende o Concello é o suficientemente variada e atractiva como para sentirse orgullosos de vivir no Pino. Mostra disto é que as escolas deportivas municipais volven recuperar o pulo de antano con máis de 400 inscritos (entre escolares e maiores), e que houbo unha grande afluencia á piscina no verán, ao ximnasio municipal e ás diferentes competicións organizadas.

Na oferta municipal non esquecemos ás persoas maiores, ás que animamos a seguir formándose en charlas ou en cursos como Camiños de coñecemento e experiencia; facer exercicio na Ximnasia por parroquias; acudir ás citas anuais cos balnearios e a praia e encontrarse con amigos e veciños na xuntanza que todos os anos organizamos na área recreativa da Magdalena.

Para mellorar a calidade de vida das persoas maiores e que poidan seguir residindo no Pino, contaremos axiña cun centro de día e unha residencia. Dous edificios que se van construír en sendas parcelas municipais na capital do concello, moi preto doutros servizos públicos esenciais para manter unha boa calidade de vida. Para que sexan realidade o antes posible, xa temos reservada unha partida económica específica nos presupostos municipais de 2023.

Todas estas actuacións e iniciativas, xunto a outras moitas, complementámolas cun ambicioso plan de investimentos en infraestruturas viarias distribuídas por todas as parroquias do concello. Consecuencia da boa xestión económica dos últimos anos, agora puidemos destinar tres millóns de euros para garantir a seguridade viaria e os desprazamentos de peóns e condutores dentro do noso termo municipal. Estes investimentos, realizados con fondos propios, complementan as grandes infraestruturas, como a que vai acometer a Xunta na depuradora de Arca, que axudan a facernos a vida un pouco máis fácil a cada un de nós e, ao mesmo tempo, contribúen a facer do Pino un municipio atractivo para visitar e para vivir nel.

Bo Nadal e venturoso Aninovo para todas e todos vós.

Manuel Taboada Vigo
Alcalde de O Pino