Un axente especializado da Deputación da Coruña estará o xoves 27 de febreiro no Pino para ofrecer información e asesoramento sobre o uso da sede electrónica das administracións local e provincial. A charla celebrarase na casa da cultura Luis Seoane entre as 11.00 e as 12.00 horas.
En concreto, os asistentes poderán coñecer o funcionamento da oficina electrónica municipal, que está dirixida á cidadanía en xeral, e da plataforma Subtel, coa que as entidades deben solicitar subvencións convocadas polo organismo provincial.
A día de hoxe, moitos trámites coa administración local deben solucionarse a través de medios telemáticos, polo que o Concello do Pino pon a disposición da veciñanza este servizo, da iniciativa PEL-Concello Dixital da Deputación da Coruña.
