O programa organizado polo Concello ten como obxectivo facilitar a conciliación familiar e laboral das familias || Os máis pequenos gozaron de saídas educativas e de lecer en paraxes naturais e culturais de Galicia ||
O programa Viaxando coa cativada do Concello do Pino continúa a rexistrar un notable éxito e unha excelente acollida entre as familias e a rapazada do municipio. Este proxecto, deseñado para facilitar a conciliación familiar e laboral durante o verán, está dirixido a nenos e nenas de entre 6 e 12 anos e ofrece unha serie de excursións a algúns dos destinos máis emblemáticos da xeografía galega.
Hoxe, mércores 28 de agosto, a cativada do Pino viviu unha nova aventura coa excursión á cidade da Coruña, onde visitaron a Casa das Ciencias, entre outros lugares. Os nenos e nenas quedaron fascinados co planetario e as múltiples exposicións interactivas que lles permitiron achegarse ao marabilloso mundo da ciencia dun xeito divertido e educativo.
Durante os meses de xullo e agosto, este programa xa levou aos máis pequenos a descubrir e gozar de paraxes únicas como as praias da Illa de Arousa, Boiro e Gandarío, onde gozaron de xogos e baños refrescantes. Tamén visitaron as piscinas naturais da área recreativa de Carixa, en Vila de Cruces, e do río Barosa, onde a beleza natural foi un dos principais atractivos. Outro dos momentos máis destacados foi a visita ao Aquarium Finisterrae e á Torre de Hércules na Coruña, onde os rapaces se marabillaron coa diversidade de especies mariñas e as impresionantes vistas da costa galega. Ademais, puxeron a proba as súas habilidades nos emocionantes circuítos do Parque de Aventuras Estuario Río Coroño en Boiro.
Todas as saídas foron moi ben recibidas, cunha ampla variedade de actividades que mantiveron á cativada entretida e activa en todo momento. O éxito deste programa, que aínda ten algunhas saídas por realizar, reflicte o compromiso do Concello do Pino por ofrecer alternativas de lecer educativo e saudable para os máis pequenos, mentres se facilita a conciliación das familias durante o verán.
Viaxando coa cativada destaca pola súa excelente organización e pola variedade de propostas que permiten aos nenos e nenas desfrutar dun verán diferente, cheo de aventuras, aprendizaxes e novas experiencias que recordarán para sempre.
Este programa está financiado pola Consellería de Política Social e Igualdade e o Ministerio de Igualdad para o desenvolvemento do Plan Corresponsables.
