-
Unhas 900 persoas participaron nesta XXVIII edición e aplaudiron as catro homenaxeadas polo Concello, de entre 93 e 96 anos ||
-
A Banda de Música de Arca, o xantar de confraternidade e o espectáculo Xuntos pola Música, de tributo a Juan Pardo, completaron a programación da multitudinaria xornada ||
Pola esquerda Sara Purificación Martínez, Mercedes Vázquez e Ramón Iglesias, co alcalde, concelleiro do goberno e a traballadora social (2ª pola esquerda)
Arredor de 900 persoas participaron este sábado na XXVIII Xuntanza dos Nosos Maiores, organizada polo Concello do Pino na área recreativa da Madalena. A celebración, dirixida á veciñanza maior de 60 anos do municipio, serviu un ano máis para favorecer o reencontro e a convivencia, rendendo homenaxe como xa é tradición a varias persoas do concello pola súa traxectoria e contribución á vida da comunidade.
Nesta edición, os protagonistas foron Ramón Iglesias Fernández, de Arca, que fixo 96 anos o pasado 4 de maio; Sara Purificación Martínez Salvado, que fixo 93 anos en Cebreiro o 16 de marzo, e Mercedes Vázquez Dubra, de Medín, que tamén naceu en 1933, no seu caso o 21 de abril. As tres persoas recibiron unha placa conmemorativa da man do alcalde, Manuel Taboada, e de concelleiros do equipo de goberno, e tamén o aplauso das centos de persoas asistentes ao emotivo encontro. A cuarta homenaxeda, Isabel Sánchez Présaras, que celebrou en San Mamede os 93 o 18 de xuño, non puido asistir á festa, recollendo a placa e o ramo de flores uns familiares no seu nome.
O alcalde destacou a importancia dunha celebración que “nos permite xuntarnos e recoñecer todo o que as persoas maiores fixestes e seguides facendo polo noso concello”. “Vós sodes unha parte fundamental da historia do Pino e temos moito que agradecervos polo voso traballo e por todo o que nos transmitistes ás xeracións que viñemos detrás”, sinalou.
Taboada felicitou de maneira especial as catro persoas homenaxeadas nesta edición e agradeceu a participación da veciñanza nunha convocatoria que volveu reunir centos de persoas, consolidándose como unha das citas máis multitudinarias do municipio.
“Chegar á edición número 28 con preto de 900 asistentes demostra o cariño que a veciñanza lle ten a esta xuntanza. É un día para reencontrarnos e desfrutar xuntos, pero tamén para lembrar que debemos seguir coidando e poñendo en valor as persoas maiores durante todo o ano”, afirmou o alcalde.
Da Banda de Música de Arca ao espectáculo tributo a Juan Pardo
A programación comezou co concerto da Banda de Música de Arca, dirixida por Andrés Pérez, seguido da misa celebrada como é habitual na carballeira da Madalena. Tras o acto de homenaxe, os asistentes compartiron o tradicional xantar de confraternidade.
O menú, elaborado por Casa Taboada, estivo composto por empanada, troitas, polbo e carne ao caldeiro, co que os asistentes puideron repoñer forzas antes dunha animada sobremesa na que non faltaron as conversas, as partidas ás cartas e o baile.
A sobremesa estivo amenizada polo espectáculo Xuntos pola Música, unha proposta musical que rende tributo á figura de Juan Pardo. Sobre o escenario, Antonio Barros, Lys Pardo, iAlma e Fernando Calderón, interpretaron algunhas das cancións máis coñecidas do compositor e cantante galego.
A participación de Lys Pardo, filla do artista, achegou un compoñente especialmente emotivo a unha actuación que convidou as persoas maiores do Pino a revivir o repertorio dun dos nomes máis destacados e queridos da nosa música.
Ao rematar, o dúo Eva e Camilo continuaron animando á festa, que volveu coincidir coa celebración do San Cristovo, que xuntou na área recreativa da Madalena a moitos camioneiros do Pino e arredores.
Album de fotos na páxina oficial de Facebook do Concello do Pino (preme aquí).
Xuntos pola Música. Tributo a Juan Pardo. Lys Pardo, Antonio Barros e Ialma protagonizaron un concerto moi seguido polo público
