-
A visita de Papá Noel e o acendido da árbore comparten protagonismo con obradoiros, xogos e unha sesión de teatro //
-
O alumnado de 4º da ESO do CPI Camiño de Santiago poñerá as bebidas e as lambetadas coa fin de recadar fondos para a excursión de fin de curso //
O Pino recibirá o Nadal cunha gran festa para todos os públicos que se celebrará este vindeiro sábado, 17 de decembro, nunha carpa instalada na Praza do Concello. Obradoiros, xogos e unha sesión de teatro serán algunhas das actividades das que poderán gozar gratuítamente todas as persoas asistentes.
A visita de Papá Noel para atender as solicitudes das nenas e dos nenos e o acendido da árbore de Nadal, previstos para as sete da tarde, marcarán oficialmente o comezo do Nadal no Pino. Pero a festa comezará xa antes, ás 16.30 horas, con varias propostas para o público familiar. Cativada e persoas adultas poderán participar xuntas en xogos en familia ou nunha xincana familiar que se desenvolverá pola contorna da Praza do Concello. Ademais, haberá obradoiros para facer adornos de Nadal, escribirlle a carta a Papá Noel, maquillaxe e tatuarse e customizar camisetas con motivos navideños, taller este último para o que convén levar da casa unha camiseta branca lisa.
Despois do acendido da árbore, a festa continuará cunha sesión de teatro. Títeres Babaluva representará ‘Feira das sementes’, unha feira na que as sementes se cambian por un conto, un refrán, unha canción ou unha adiviña.
E, se hai fame, convén saber que durante toda a tarde o alumnado de 4ª de ESO ofrecerá bebidas quentiñas e lambetadas coa fin de recadar fondos para a excursión de fin de curso.
Nadal Benéfico
Neste tempo de Nadal e de solidariedade, o Concello do Pino pon en marcha unha nova edición de Nadal Benéfico. Trátase dunha iniciativa destinada a recoller alimentos non perecedoiros, de hixiene persoal e de limpeza para doarllos ás familias con menos recursos. As doazóns deberán depositarse nos caixóns situados na Casa da Cultura, nas dependencias de Servizos Sociais ou nos supermercados Eroski, Día e Rúa.
O prazo para participar no Nadal Benéfico remata o 31 de xaneiro, pero o Concello recorda que se poden facer aportacións durante todo o ano.
