Poderá acudir a cinco sesións que se desenvolverán todos os mércores pola tarde entre o 18 de maio e o 15 de xuño // O Concello sufraga o autobús, que sairá ás 16.30 horas //
Vai de auga é a iniciativa pola que o Concello do Pino convida á veciñanza a gozar dos beneficios das augas termais do balneario de Cuntis en cinco sesións que se desenvolverán outros tantos mércores de maio e xuño. O Concello sufraga o autobús para o desprazamento ata a localidade pontevedresa para que as persoas participantes poidan desfrutar do circuíto lúdico-termal do Acquaform, o complexo acuático de augas terapéuticas máis grande de Galicia.
Esta actividade, que foi interrompida pola pandemia nos últimos anos e agora se retoma, levarase a cabo todos os mércores pola tarde entre o 18 de maio e o 15 de xuño, con saída en autocar dende a praza do Concello do Pino ás 16.30 horas e regreso ao remate da sesión. O prezo para os cinco días é de 70 euros.
As prazas son limitadas e para inscribirse abonda con chamar por teléfono ao número da Casa da Cultura 981 511 065 e cubrir logo un formulario. Lémbrase que os menores deberán ter a supervisión dunha persoa adulta.
