O Consello da Xunta autorizou este luns a sinatura dun convenio polo que o Goberno galego achegará 150.000 euros para financiar a construción do novo equipamento || O edificio ofrecerá un espazo polivalente para actividades culturais, sociais, formativas e comunitarias e contará tamén cun soportal cuberto para ampliar os seus usos ||
O Pino contará cun novo centro sociocultural en San Mamede de Ferreiros grazas ao convenio de colaboración entre o Concello e a Xunta de Galicia, autorizado este luns polo Consello da Xunta. A través deste acordo, a Consellería de Cultura, Lingua e Xuventude achegará 150.000 euros para financiar a construción dun novo equipamento destinado a actividades culturais, sociais, formativas e comunitarias.
O investimento total previsto ascende a 249.000 euros, polo que a achega da Xunta cubrirá preto do 60 % do custo da actuación. O novo edificio permitirá ampliar a oferta de espazos para a celebración de actividades abertas á veciñanza e reforzará os servizos destinados ao tecido asociativo do municipio.
O proxecto contempla un espazo interior polivalente e un soportal cuberto, unha solución que facilitará a organización de actividades tanto no interior como no exterior e mellorará a funcionalidade do recinto. A nova infraestrutura situarase nun ámbito xa vinculado tradicionalmente á celebración de encontros veciñais, contribuíndo á dinamización social e cultural da contorna.
A actuación responde tamén á importancia de San Mamede de Ferreiros como punto de paso do Camiño Francés, dotando este núcleo dun equipamento que poderá acoller actividades de promoción e de difusión do patrimonio local, ademais de iniciativas culturais e comunitarias.
Coa autorización do convenio por parte do Consello da Xunta dáse un novo paso para facer realidade esta actuación, que permitirá ao Concello do Pino contar cun espazo moderno, versátil e adaptado ás necesidades actuais da veciñanza e das asociacións locais.
