Os dous puntos de información turística do Concello do Pino recibiron durante este verán a visita de 6.224 peregrinos na busca de información sobre o Camiño de Santiago e os atractivos do municipio e da bisbarra. A oficina de turismo local, situada no Centro Sociocultural Luis Seoane, contou neste período estival co apoio doutra localizada ao carón do albergue público de Arca.
Dous técnicos de turismo atenderon estes puntos de atención, que rexistraron un total de 6.224 turistas dende o 15 de xuño ata o 30 de setembro. O 67% dos peregrinos que visitaron estas instalacións proviñan de España, sendo Andalucía e Madrid as comunidades autónomas con máis representación. No que se refire aos peregrinos estranxeiros, o 26% deles foron italianos, seguidos polos alemáns, cun 10%.
A información mais demandada foi a referida aos detalles sobre a derradeira etapa do Camiño de Santiago. O obxectivo principal do Concello coa apertura deste servizo foi o de facilitar a estancia e o tránsito dos peregrinos e peregrinas polo municipio, tendo en conta que cando os camiñantes chegan ao Pino levan moitos quilómetros enriba e están esgotados.
Os puntos de información permaneceron abertos durante os meses de verán, dando servizo na temporada de máis afluencia de visitantes. A oficina situada xunto ao albergue pechou o 30 de setembro, mentres que a localizada no Centro Sociocultural Luis Seoane seguirá atendendo aos peregrinos ata o mes de decembro.
O Concello do Pino contou co financiamento da Xunta de Galicia e máis da Deputación da Coruña para contratar aos dous técnicos de turismo.
