• Premiará os mellores traballos de cada unha das cinco categorías
O Concello do Pino convoca un ano máis o seu tradicional concurso de postais de Nadal, dirixido a todo o alumnado do CPI Camiño de Santiago e da Escola Unitaria de Gonzar, así como á rapazada en idade escolar empadroada no Concello. Os traballos poderán presentarse ata o luns 2 de decembro.
O concurso de postais de Nadal chega á súa 22 edición mantendo o espíritu de fomentar as artes plásticas e difundir as tradicións do Pino entre a cativada do municipio. Aquelas nenas e nenos que queiran participar deberán facer unha composición centrada na celebración destas festas e poderán utilizar calquera técnica cos únicos requisitos de que o seu traballo sexa orixinal e inédito, teña un tamaño máximo Din-A4 e leve a inscrición “O Pino. Bo Nadal e feliz 2025”.
Establécense un total de cinco categorías, divididas por idades: educación infantil; 1º e 2º de primaria, 3º e 4º de primaria, 5º e 6º de primaria e educación secundaria.
Os traballos, que poden facerse tanto individualmente como en grupo, poderán presentarse no Rexistro Xeral ou por sede electrónica ata o luns 2 de decembro. Para a presentación, cada alumno/a ou grupo fará figurar na súa postal un número que lle asignara o seu titor, así como o curso e a idade do/s participantes. Este debuxo gardarase nun sobre pechado que levará o mesmo número asignado e que se acompañará, nun segundo sobre, do formulario Anexo I debidamente cuberto. Os centros escolares -CPI Camiño de Santiago e Escola Unitaria de Gonzar- encargaranse de presentar no Rexistro Xeral os que alí se entreguen.
Os gañadores do concurso daranse a coñecer a partir do 9 de decembro e os premios, que se entregarán o día da cabalgata de Reis, consistirán en lotes de libros e material escolar valorados nos seguintes importes: 41,85 euros na categoría de educación infantil; 51,60 euros no primeiro ciclo de primaria; 34,90 euros no segundo ciclo; 22,45 euros no terceiro; e 34,01 en secundaria. Haberá un premio por categoría.
O documento coas bases e co formulario anexo que hai que cubrir para acompañar a postal que se presenta a concurso pode descargarse no documento adxunto.
