Explicar “as motivacións e o que senten os peregrinos cando fan o Camiño de Santiago” é o obxectivo que persegue a mostra ‘O fin do Camiño’, promovida polo colectivo Egeria e que, despois de exporse en Santiago foi inaugurada onte na Casa de Cultura de o Pino polo alcalde, Manuel Taboada, e o presidente de Egeria, Xulio Xiz, e que se poderá visitar ata o 3 de decembro.
“Quen fai o camiño ten unha motivación externa e outra interna, e ao rematar o seu peregrinar dáse conta que remata unha etapa importante da súa vida”, explicaba Xulio Xiz durante o acto oficial de inauguración.
A mostra está composta por 10 paneis con fotos e textos en galego, castelán e inglés, nos que se fai alusión, entre outros, a temas como ‘O motor da fe’, ‘Hai máis de mil anos’ ou ‘Cara a unha terra de brumas e luz’. O panel que da nome a exposición expresase que “os Camiños que conducen a Compostela teñan unha fin física” delimitada, pois todos acaban diante da tumba do Apóstolo Santiago, para rematar asegurando que nese punto “remata o Camiño físico, o esforzo, o sacrificio. E aquí empeza todo. A fin do Camiño física é o comezo dunha vida diferente”.
Esta exposición vai percorrer o Camiño Francés por Galicia en sentido inverso. Empezou en Santiago, e despois de permanecer no Pino ata o 3 de decembro continuará por Arzúa, Melide ata Pedrafita do Cebreiro entre os meses de decembro e xaneiro. “Despois continuaremos polos outros camiños”, explicou Xiz.
Más fotos no Facebook do Concello de O Pino (Neste enlace)
