As solicitudes deberán presentarase na sede electrónica ou presencialmente no rexistro municipal ||
O prazo de inscrición rematará o mesmo día do concurso, antes do seu inicio ||
A edición deste ano establece sete categorías, entre elas a do disfrace máis orixinal ||
O Concello do Pino celebrará o domingo 19 de febreiro o tradicional Concurso de Entroido. Será a partir das 17.30 horas, na praza do Concello. A edición deste ano conta cun total de 1.875 euros en premios repartidos en sete categorías.
Todas as persoas interesadas en participar deberán formalizar previamente a súa inscrición cubrindo a solicitude de participación e presentándoa presencialmente no rexistro do Concello, de luns a venres en horario de 8.30 a 14.00 horas. A inscrición tamén se poderá formalizar na sede electrónica do Concello ata que empece o concurso o 19 de febreiro.
O Concurso de Entroido 2023 Concello do Pino contempla siete categorías, todas elas con premios en metálico: infantil (ata 12 anos), cun primeiro premio de 150€ e un segundo de 100 €; individual (150 euros); parella (174 €), grupo (250 €); comparsa (400 €) carroza (500 €) e ao disfrace máis orixinal (150 euros).
Segundo establecen as bases do concurso, as comparsas deberán estar compostas por un mínimo de 10 persoas representando un mesmo motivo. O día do concurso poderán realizar un pequeno espectáculo (interpretación musical, coreografía, escenografía…) de tres ou catro minutos. Os grupos poderán estar formados por entre 3 e 9 persoas e as carrozas por un mínimo de 4 representando algún motivo enriba dun móbil.
O xurado valorará a orixinalidade do vestiario, a estética, a creatividade, a elaboración dos disfraces, comparsas e carrozas (que sexa un traballo feito a man e que empreguen materiais de refugallo). Tamén se valorará a posta en escena, a animación musical, a capacidade de interacción co público, a mobilización de masas, a sátira e ou a crítica social construtiva, ademais do emprego do galego oral e escrito.
As bases do Concurso de Entroido pódense consultar na web do Concello. Tamén se pode descargar a ficha de inscrición e a autorización de menores, que deberá ser entregada asinada polo pai, a nai, titor ou titora.
As fichas de inscrición nas diferentes categorías pódense descargar nos seguintes arquivos, e tamén consultar as bases do concurso.
Inscrición concurso Entroido O Pino 2023. Categoría GRUPO-COMPARSA-CARROZA
