Unha carpa climatizada acollerá ata as dúas da mañá as actuacións do DJ Rokiño, do grupo Nueva Fuerza e do artista local DJ Toni Salvaje // As Súas Maxestades iniciarán en Pereira o seu percorrido polas parroquias ás 10.45 horas //
A cativada contará con inchables no pavillón de Reboredo mentres agarda a chegada da comitiva real //
O Concello do Pino recibirá os Reis Magos o 5 de xaneiro cunha gran festa que incluirá, ademais do tradicional percorrido polas parroquias e a celebración para as familias no pavillón de Reboredo, unha sesión de música dirixida á mocidade que comezará ás oito da tarde e se prolongará ata a madrugada.
Sons de Reis é o nome do festival de música que o Concello do Pino dedicará á xente nova. Unha carpa climatizada instalada a carón da Casa da Cultura acollerá a partir das 20.00 horas as actuacións do DJ Rokiño, do grupo Nueva Fuerza e do artista local DJ Toni Salvaje. Cada un deles fará dúas sesións de unha hora para levar a festa ata as dúas da mañá na noite máis máxica do ano.
A véspera de Reis, que nesta ocasión cae en domingo, será tamén no Pino un día de alegría e ilusión para o público miúdo. As Súas Maxestades de Oriente iniciarán o seu tradicional itinerario por todo o municipio cunha primeira parada en Pereira ás 10.45 e pasarán ao longo do día por Castrofeito (11.10h.), Budiño (11.35h.), O Pino (12.00h.), Gonzar (12.20h.), Medín (13.00h.), Pastor (13.30h.), Lardeiros (13.50h.), San Breixo (17.30h.), San Mamede (17.45h.), San Miguel de Cerceda (18.05h.) e Cebreiro (18.30h.). Rematado o percorrido, os Reis saudarán e recollerán unha vez máis as peticións de toda a cativada no pavillón de Reboredo a partir das 19.30 horas.
O polideportivo terá abertas as súas portas dende as 17.30 horas con inchables gratuítos. O tempo de espera ata a chegada da comitiva real aproveitarase ademais para realizar o acto de entrega dos premios do concurso das postais de Nadal. A festa familiar rematará coa tradicional chocolatada, acompañada como non podía ser doutro xeito de roscón de Reis.
