-
Ata o 31 de xaneiro de 2023 pódese colaborar con alimentos non perecedoiros, conservas, produtos de hixiene persoal e de limpeza //
-
Os donativos distribuiranse entre as familias vulnerables do municipio //
-
Os puntos de recollida están na Casa da Cultura, nos Servizos Sociais do Concello e nos supermercados Eroski, Día e Rúa //
O Concello do Pino ten en marcha unha nova edición do Nadal Benéfico para recoller alimentos non perecedoiros, alimentos en conserva, produtos de hixiene persoal e produtos de limpeza destinado ás familias con menos recursos do municipio. Todas aquelas persoas que desexen colaborar con esta iniciativa poderán depositar as súas aportacións ata o 31 de xaneiro de 2023 nun dos cinco puntos de recollida establecidos polo. Todo os alimentos e produtos recadados ao longo da campaña benéfica serán repartidos ao longo do vindeiro ano polo departamento de Servizos Sociais do Pino entre as familias máis vulnerables do Pino ou entre aquelas persoas que estean a pasar dificultade.
As doazóns poderán depositarse nos caixóns situados na Casa da Cultura e nos Servizos Sociais do Concello ou nun dos tres supermercados que se sumaron á iniciativa: Eroski, Día e Rúa, que teñen a disposición da súa clientela un carriño no que deixar os donativos.
A veciñanza e os visitantes poden colaborar coa campaña benéfica posta en marcha polo Concello do Pino aportando comida enlatada como fabas, lentellas, garavanzos, froitas en conserva ou potiños para bebés, que tamén serven para as persoas maiores; aceites, latas de conserva, pasta ou aqueles produtos non perecedoiros que sirvan para preparar comida. Tamén compresas, cueiros, xabón, xampú ou calquera outro produto de hixiene persoal e produtos de limpeza para o fogar.
O Concello agradece a implicación e a colaboración da veciñanza e lembra que aínda que a campaña do Nadal Benéfico remata o 31 de xaneiro as aportacións seguen admitíndose en calquera data.
