O prazo para entregar o xustificante de pagamento das quendas de agosto e setembro remata o 26 de xullo de 2024 || O Concello do Pino oferta un total de 260 prazas para conciliar nas seis quendas do Lecer Verán ||
23 de xullo de 2024
Faise pública a listaxe de menores admitidos nas quedas de agosto e setembro no Lecer Verán 2024, e a cantidade a ingresar segundo o prezo público que se recolle no anexo 1.
O xustificante de pagamento deberá ser entregado nas dependencias do Concello ou a través da sede electrónica con data límite 26-07-2024 para as quendas de agosto e setembro.
A listaxe pode consultarse no documento adxunto
Listaxe de menores admitidos nas quendas de agosto e setembro do Lecer Verán 2024
18 de xuño de 2024
O Concello do Pino admitiu a totalidade das solicitudes presentadas para participar nas quendas de xuño e xullo do Lecer Verán 2024, ao cumpriren todas elas os requisitos sinalados nas bases.
O pagamento da cota deberá facerse mediante ingreso na conta bancaria ABANCA ES70 2080 0337 1131 1000 0078, especificando o nome da persoa usuaria e as datas de asistencia. Así mesmo, hai que entregar o xustificante de pago nas dependencias do Concello ou a través da sede electrónica na data límite do 20 de xuño de 2024 (para as quendas de xuño e xullo).
Listaxe de participantes admitidos nas quendas de xuño e xullo do Lecer Verán
29 de maio de 2024
O Concello do Pino abriu o prazo de inscrición para Lecer Verán, que na súa edición de 2024 ofrece 90 prazas en xullo, 70 en agosto e 50 en xuño e setembro, co obxectivo de facilitar a conciliación familiar durante as vacacións escolares de verán. Este programa está destinado a nenos e nenas de 3 a 12 anos e desenvolverase en seis quendas desde o 24 de xuño ata o 10 de setembro. As solicitudes para as tres primeiras quendas, de xuño a xullo, poden presentarse ata o 17 de xuño; mentres que o prazo para anotarse nas quendas de agosto e setembro finaliza o 19 de xullo.
Lecer Verán 2024 estrutúrase en seis quendas, adaptándose ao calendario escolar: do 24 ao 30 de xuño, a primeira quincena de xullo, do 16 ao 31 de xullo, do 1 ao 15 de agosto, a segunda quincena de agosto e, finalmente, do 1 ao 10 de setembro. As actividades levaranse a cabo no pavillón municipal de Reboredo e nos exteriores do CPI Camiño de Santiago, de luns a venres en horario de 8.00 a 15.00 horas, excepto nos días festivos, nos que non haberá servizo.
Os prezos de Lecer Verán son de 20 euros por quincena en xullo e agosto (40€ por mes completo) e de 10 euros nas quendas de xuño e setembro. As familias numerosas gozarán dun desconto do 20% a partir do segundo fillo, presentando o correspondente título de familia numerosa. Tamén as familias monoparentais terán un desconto do 20%, achegando o certificado de monoparentalidade.
O prazo para inscribirse nas tres primeiras quendas de Lecer Verán 2024 (xuño e dúas quincenas de xullo) finaliza o 17 de xuño, mentres que para as dúas quendas de agosto e a de setembro o prazo esténdese ata o 19 de xullo. A solicitude de admisión pode descargarse no arquivo adxunto a esta nova ou recollela nas oficinas do Concello en horario de 9.00 a 14.00 horas. Unha vez cuberta, a ficha de inscrición debe presentarse na sede electrónica ou directamente no Concello, acompañada da instancia que tamén está dispoñible nos arquivos adxuntos e da documentación requirida segundo as bases.
Se o número de solicitudes supera a oferta de prazas, aplicarase a seguinte orde de prioridade: estar empadroado no Concello cun mínimo de tres meses de antigüidade; valoración técnica dos Servizos Sociais en casos especiais; ser familia monoparental ou monomarental; menores escolarizados no Concello do Pino; que o pai, nai ou titor/a legal traballe no municipio; e participantes que estean pasando as súas vacacións no Pino. Os solicitantes non admitidos entrarán nunha lista de agarda. No caso de irmáns que soliciten a mesma quenda, a admisión dun implicará a admisión dos demais.
As cotas deberán aboarse unha vez confirmada a praza, despois da publicación das listaxes de admitidos no taboleiro de anuncios e na páxina web do Concello. Na listaxe indicarase a cantidade a pagar e as datas de asistencia. Unha vez realizado o pago en ABANCA ES70 2080 0337 1131 1000 0078, deberá presentarse o xustificante nas oficinas do Concello ou a través da sede electrónica antes do 20 de xuño para as quendas de xuño e xullo e do 26 de xullo para as quendas de agosto e setembro.
Este programa está financiado pola Consellería de Política Social e Igualdade e o Ministerio de Igualdad para o desenvolvemento do Plan Corresponsables.
