O alcalde de O Pino, Manuel Taboada, inaugurou esta mañá a exposición Camiño ComPostal, organizada pola Asociación de Periodistas e Estudosos do Camiño de Santiago (APECSA) coa colaboración da Xunta, dentro do programa O teu Xacobeo. A mostra xunta máis dun cento de postais históricas do Camiño de Santiago, todas elas con máis dun século de antigüidade. Camiño ComPostal pode visitarse no centro sociocultural Luís Seoane en Arca ata o día 28 de decembro.
A exposición percorre desde comezos de outono doce localidades situadas no Camiño Francés. Camiño ComPostal ofrece unha visión diferente sobre a Ruta, mostrando a través destas pequenas tarxetas como eran as vilas tanto de Francia coma do norte de España, e quen eran os personaxes que peregrinaban a Compostela naquela altura.
Á apertura da mostra asistiron o alcalde de O Pino, Manuel Taboada; o presidente de APECSA, Xosé María García Palmeiro; o comisario da mostra, o xornalista e reporteiro gráfico José Manuel Salgado; así coma membros da corporación municipal do Pino. Para Manuel Taboada, estas imaxes “reflicten moi ben os cambios que experimentaron as vilas polas que pasa o Camiño”. A exposición é “unha boa ocasión para recordar o que foi o Camiño, para lembrar o pasado, pero tamén para proxectar o Camiño cara o presente e o futuro”, dixo o alcalde.
Pola súa banda, o presidente de APECSA destacou “ a humilde contribución que quere facer a Asociación para atender a dispersión poboacional de Galicia con iniciativas coma esta”. Neste sentido, Palmeiro remarcou a “gran viveza do concello de O Pino, que sabe atender esta realidade territorial e humana”. En canto á exposición, Palmeiro afirmou que “as postais foron o selfie do século pasado”, na mesma liña na que se expresou o comisario, José Manuel Salgado: “Estas imaxes ofrécennos unha mirada nostálxica cara ao pasado, pero tamén nos dan información sobre como eran as cousas daquela. Son xornalismo e información, non só recordo”.
Máis fotografías da inauguración, no Facebook do Concello de O Pino.
