Manuel Taboada reuniuse en San Caetano con María Martínez Allegue ||
Na reunión abordáronse outros temas de interese para o municipio ||
O alcalde do Pino, Manuel Taboada, solicitoulle á conselleira de Vivenda e Planificación de Infraestruturas, María Martínez Allegue, a construción de vivenda de protección oficial no concello do Pino para facilitar o acceso á vivenda a xente máis nova e as familias.
Nunha reunión de traballo celebrada este 14 de xaneiro na sede da consellería, en Santiago, ambos dirixentes abordaron posibles actuacións en materia de urbanismo no municipio.
Manuel Taboada trasladoulle á consellería a necesidade de ofertar vivenda pública de protección en Arca como medida para facilitar o asentamento de poboación no Pino e facilitar o acceso á vivenda a xente moza.
Martínez Allegue comprometeuse a analizar esta petición e ver a posibilidade de levar a cabo esta iniciativa nun futuro próximo.
Na reunión tamén se abordou o proceso de modificación do PXOM nos núcleos rurais do Pino para facilitarlle á xente nova poder construír casas unifamiliares a carón das súas familias. Esta medida, na que o Concello leva traballando xa varios meses, permitirá fixar poboación no municipio respectando os usos e costumes do rural.
A humanización dalgunhas zonas en Arca e outros temas urbanístico de interese para o concello tamén foron abordados nesta reunión.
A conselleira e o rexedor coincidiron na importancia da colaboración entre as administracións para impulsar os proxectos que contribúan a mellorar a calidade de vida da veciñanza e a reforzar a competitividade do municipio.
