Nunha reunión celebrada na Xunta o alcalde solicitoulle ao conselleiro e a directora xeral de Agader poñer en marcha este proceso, que afecta a 837 e 349 hectáreas ||
Xa está publicada na web da Oficina Virtual do Medio Rural a consulta pública inicial de cara á súa posible execución, co obxecto de que os interesados poidan presentar alegacións deica o próximo 3 de abril ||
No Concello do Pino xa se remataron 13 zonas de concentración parcelaria, cunha superficie que acada as 9.319 hectáreas e con 5.705 propietarios implicados ||
A Xunta de Galicia ven de por en marcha a tramitación para a avaliación previa das zonas de reestruturación parcelaria dos montes de Arca II e de San Miguel de Pereira, con 837 hectáreas e 349 hectáreas respectivamente. Así o acordaron o conselleiro do Medio Rural, José González, e o alcalde do Pino, Manuel Taboada, nunha reunión celebrada na sede da Consellería en San Caetano, na que tamén estivo presente a directora xeral da Axencia Galega de Desenvolvemento Rural (Agader), Inés Santé.
Esta reunión celebrouse a petición do alcalde, despois de que o conselleiro visitase O Pino o pasado 31 de xaneiro. Manuel Taboada agradeceulle a José González a rapidez en poñer en marcha estas novas concentracións parcelarias “que lle van facilitar á veciñanza poñer en valor os montes, fomentar o mantemento e a sustentabilidade das parcelas e facer unha explotación máis racional das súas terras. Unhas medidas que tamén contribúen a previr incendios forestais nunha das zonas máis poboadas do municipio”, asegura o alcalde.
A Xunta xa ten publicada na web sobre parcelarias da Oficina Virtual do Medio Rural a consulta pública inicial de cara á posible execución destas zonas, co obxecto de que as persoas involucradas poidan presentar alegacións deica o próximo 3 de abril. En concreto, no apartado Consultas públicas poderanse atopar os documentos de consulta do cumprimento dos obxectivos xerais e os planos relativos a estes dous procesos.
Tanto o alcalde como a Xunta destacan que no Concello do Pino xa se remataron 13 zonas de reestruturación parcelaria, cunha superficie concentrada que acada as 9.319 hectáreas, afectando a 80.724 parcelas e a 11.124 predios resultantes de 5.705 persoas propietarias.
As concentracións parcelarias son unha ferramenta fundamental para paliar o minifundismo presente na nosa comunidade, dende o punto de vista da estrutura da propiedade, lembran dende a Consellería de Medio Rural. Así, permite reorganizar parcelas de cara ao redimensionamento das explotacións, facéndoas máis rendibles e abaratando os custos de produción, incrementando a súa sustentabilidade e competitividade no mercado. Así mesmo, posibilita mellorar as vías de comunicación, non só para as parcelas, senón entre poboacións, o que supón maior dotación de servizos básicos que potencian a calidade de vida no rural, entre outras actuacións relativas a infraestruturas, engade a Consellería.
Dende a Xunta séguense impulsando estes procesos da man da Lei de recuperación da terra agraria de Galicia, que veu complementar e desenvolver o marco legal actual, para culminar un camiño iniciado pola Lei da mellora da estrutura territorial agraria de Galicia (Metaga). Este ano, a Xunta ten previsto investir 17 millóns de euros no desenvolvemento de distintas zonas de concentración parcelaria e destaca que se destinarán 6 millóns de euros a un plan extraordinario para arranxar camiños de parcelarias.
O alcalde, Manuel Taboada , e o Conselleiro José González visitan un camiño en San Mamede de Ferreiros que vai arranxar a consellería
Visita do conselleiro ao Pino
Co inicio das concentracións de monte en Pereira e Arca, a Consellería atende as peticións formuladas en varias ocasións tanto polo alcalde, Manuel Taboada, como pola Asociación de Veciños de Arca.
O pasado 31 de xaneiro, o conselleiro José González e a directora xeral de Agader, Inés Santé, visitaron o Pino. Acompañados polo alcalde foron ver, entre outras localizacións, o camiño que comunica a localidade de Frechazo Primeiro (San Mamede de Ferreiros) ata o límite co Concello de Touro, e que vai arranxar a Consellería.
Nesa xuntanza, Manuel Taboada volveulle reiterar ao conselleiro a necesidade de concentrar os montes de Pereira e Arca, para ordenar o territorio e fomentar o mantemento e a sustentabilidade das parcelas. Petición que foi atendida por José González, que citou a Manuel Taboada no seu despacho de San Caetano para poñer en marcha este proceso.
Con anterioridade, en abril de 2021, cando José González entregou os títulos da concentración parcelaria de Budiño, Antonio Regueiro, en representación da Asociación de Veciños de Arca, mantivo unha reunión na casa consistorial co propio conselleiro e con Inés Santé. Alí entregoulles máis de 200 sinaturas de propietarios solicitando a concentración de monte da parroquia de Arca. Nesa reunión, Manuel Taboada tamén solicitara a concentración de monte da parroquia de Pereira.
Agora que a Consellería de Medio Rural puxo en marcha o proceso, e coa nova Lei de recuperación da terra agraria de Galicia, os trámites para rematar este reestruturación parcelaria redúcense considerablemente.
