A unidade móbil instalarase diante do centro de saúde e ofrecerá servizos de estimulación, podoloxía e audioloxía ||
É preciso solicitar cita previa nos teléfonos 622 748 283 ou 623 546 992 ||
Haberá unha charla sobre audioloxía o martes 5 de setembro na Casa da Cultura ||
Coidados porta a porta, o programa da Xunta de Galicia que presta atención ás persoas maiores de 55 anos do rural co fin de previr a dependencia, prestará os seus servizos no Pino en setembro. Unha unidade móbil estacionará diante do centro de saúde os días 4, 5, 6 e 7 deste mes en horario de 9.00 a 20.00 horas.
O programa ofertará novamente tres tipos de servizos: estimulación da memoria, podoloxía e audioloxía.
Nesta ocasión impartirase unha charla sobre audioloxía. Será o martes 5 de setembro, ás 19.00 horas, na Casa da Cultura.
Para poder gozar destes servizos, as persoas maiores de 55 anos que estean interesadas deberán concertar cita previa chamando aos teléfonos 622 748 283 ou 623 546 992. Tamén poderán concertar cita e o/ou obter máis información no enderezo electrónico coidadosportaaporta.politicasocial@xunta.gal
Cabe subliñar que a actuación no ámbito da estimulación da memoria ten como obxectivo previr e minorar o proceso de deterioro cognitivo en persoas maiores mediante procesos de activación cognitiva e funcional e coa promoción do envellecemento activo.
No servizo de podoloxía, os profesionais ofrecen dende unha consulta básica á limpeza de unllas, eliminación de durezas, calosidades e helomas así como unha valoración do estado xeral do pé.
As persoas maiores tamén poderán someterse a unha exploración gratuíta do oído para frear a perda auditiva.
