O programa desenvolverase do 13 ao 17 de xullo no campo municipal de Reboredo ||
Inclúe descontos para xogadores da SD O Pino e participantes nas Escolas Deportivas Municipais ||
Xa está aberto o prazo de inscrición para participar no Campus de Verán Celta by Cabreiroá 2026, unha iniciativa formativa e deportiva impulsada polo RC Celta que volverá contar este verán cunha sede no Concello do Pino.
O campus desenvolverase no Campo Municipal de Reboredo entre os días 13 e 17 de xullo e está dirixido a nenos e nenas de entre 5 e 16 anos.
Durante cinco xornadas, as persoas participantes poderán desfrutar de adestramentos baseados na metodoloxía oficial do RC Celta, combinando aprendizaxe, actividade física e diversión a través de diferentes xogos, competicións e dinámicas deportivas.
A actividade desenvolverase en horario de mañá, con entrada entre as 9.30 e as 9.40 horas, actividade de 9.45 a 13.45 horas e saída entre as 13.50 e as 14.00 horas.
O campus inclúe equipación completa de adestramento -camiseta, pantalón e medias-, merenda diaria, diploma acreditativo, participación en competicións e actividades, así como un sorteo de agasallos ao remate da semana. Ademais, os participantes poderán optar ao denominado Premio Afouteza, que ofrece a posibilidade de adestrar con A Canteira do RC Celta.
Os prezos establecidos para esta edición son de 165 euros na tarifa xeral e 149 euros no caso das persoas beneficiarias do desconto.
Prezos reducidos
Neste sentido, poderán acceder ao prezo reducido os xogadores e xogadoras da SD O Pino, así como os rapaces e rapazas inscritos nas Escolas Deportivas Municipais. Para beneficiarse deste desconto deberán seleccionar durante a inscrición a opción “prezo con desconto” e indicar como club colaborador ou convenido a SD O Pino.
No caso dos xogadores federados da SD O Pino será necesario achegar copia da ficha federativa, mentres que os participantes das Escolas Deportivas Municipais deberán presentar a ficha Xogade, documento que poderá solicitarse no departamento municipal de Deportes.
Desde a organización lembran que as prazas son limitadas e adoitan completarse rapidamente, polo que recomendan realizar a inscrición coa maior antelación posible.
As persoas interesadas poden consultar toda a información relativa ao campus premendo neste enlace e formalizar a súa inscrición a través deste enlace.
