A veciñanza do Pino leva xa dúas semanas acudindo á piscina municipal de Lameiro, que inaugurou a tempada de verán o pasado día 3. Ata o momento, hai máis de 150 persoas abonadas para poder acudir a piscina a prezos reducidos, un número considerablemente inferior aos do pasado verán, cando se superaron os 400 abonados.
Nos cursos de natación tamén se reduciron considerablemente os asistentes. Para o mes de xullo hai inscritas apenas unha vintena de persoas.
A pandemia da covid-19 está influíndo nesta tendencia á baixa dos usuarios da piscina, que debe cumprir as normas marcadas pola Xunta de Galicia para evitar a propagación do coronavirus. A ocupación das instalacións non poden superar o 75% da súa capacidade. En caso de que haxa máis demanda, establecerase un servizo de cita previa.
As actividades da piscina están vixiadas constantemente por socorristas para evitar incidentes. A contratación dun deles está subvencionada pola Xunta de Galicia e os outras dúas persoas pola Deputación da Coruña.
As persoas interesadas aínda poden retirar os seus abonos nas oficinas municipais, de luns a venres en horario de 10.00 a 14.00 horas.
En canto aos diferentes prezos, os bonos gozan dunha gran vantaxe. Fronte aos 3,60 euros que custa unha entrada diaria, os residentes en O Pino poden comprar o bono por 12 euros os adultos e 6 euros os nenos ata dezaseis anos incluídos. Para os non residentes no concello, as tarifas bonificadas duplícanse, 24 euros para os adultos e 12 para a rapazada. Ademais, os cativos menores de dous anos poden entrar de balde á piscina e tamén existe a posibilidade de comprar un bono familiar, que teñen o seguinte custo:
- Bono pai e nai: 15 euros
- Cota primeiro fillo: 6 euros
- Cota segundo fillo: 3 euros
- Cota terceiro fillo: gratis
Os cursos de natación celebraranse en dúas quendas de luns a xoves de 12.30 a 13.15 horas, pero tan só se poderá ir dous días á semana e tamén é obrigatorio estar previamente aboado. Os nenos ata dezaséis anos poden inscribirse por 3 euros ao mes, mentres que os adultos por 9 euros. Tamén os rapaces e rapazas gozarán dun desconto do 25% para o acceso á piscina se posúen o carné xove.
