A Consellería de Medio Ambiente, Territorio e Vivenda está a ultimar a licitación das obras de mellora e humanización nos concellos do Pino e Touro, que en conxunto suman case 275.000 euros.
A conselleira de Medio Ambiente, Territorio e Vivenda, Ángeles Vázquez, trasladou esta información a Manuel Taboada, alcalde do Pino, co que esta mañá mantivo unha reunión de traballo, na que tivo a oportunidade de repasar os proxectos comprometidos polo departamento que dirixe Vázquez Mejuto. Recordou que se trata dunha colaboración interadministrativa, na que a Xunta aporta un 70% en cada caso e a porcentaxe restante é asumida por cada administración local; enmarcada dentro do Plan hUrbe, un programa posto en marcha polo Goberno galego no ano 2010 para apoiar ás entidades locais á hora de levar a cabo actuacións que contribúen a crear ou humanizar espazos de uso común e a garantir o acceso dos veciños a infraestruturas públicas e servizos.
O convenio entre a Consellería de Medio Ambiente e o Concello do Pino ten por obxecto a instalación de catro illas de contedores soterrados, para facilitar a separación de residuos aos cidadáns. Esta medida responde á necesidade de facilitar equipamentos e servizos aos veciños, ao tempo que se evitan os impactos visuais que provocan este tipo de instalacións nas rúas que se ubican. Os traballos de implantación esixirán a demolición do pavimento, pero- unha vez instalados- reporase o pavimento e os servizos afectados durante a execución das obras.
O importe que fixa o convenio para realización desta actuación, que prevé un prazo de execución de seis meses, ascende a 215.000 euros, dos cales un 70% polo Goberno galego. Por último, recordou que ao abeiro do programa hUrbe xa se executaron 200 intervencións nun total de 125 concellos, o que significa que no período 2010-2018 a Xunta actuou case no 40% dos municipios de Galicia.
Durante o encontro, tanto Ángeles Vázquez, como Manuel Taboada, destacaron que esta acción «facilitará o proceso de reciclaxe e mellorará o entorno do concello, algo que tamén repercutirá na experiencia de todos os peregrinos que visiten O Pino nos vindeiros meses e durante o Xacobeo 2021».
