Unha gran maioría dos pequenos animaron a facer canóns de confetti e tamén pompóns de la ||
Pequenos e maiores seguiron atentos o espectáculo de títeres mentres degustaban flocos de millo ||
A primeira xornada da Festa de Nadal do Pino resultou todo un éxito onte na praza do Concello, ata onde se achegaron varias ducias de nenos e nenas para gozar cos xogos tradicionais, aprender a facer canóns de confetti e tamén pompóns de la ou múltiples figuras con globos. O espectáculo de títeres xuntou a pequenos e maiores dende as sete e media do serán.
Dende primeira hora da tarde, a carpa instalada polo Concello foi atraendo a nenos e nenas para descubrir algúns xogos tradicionais que descoñecían. Se a primeira hora, a maioría se puxo a facer canóns de confetti, pouco a pouco moitas nenas, nenos e maiores acercáronse a Eva Varela para facer cada quen o seu propio pompón de la, de vistas cores e tamaños, mentres outros se poñían a pintar ou a facer globos con diferentes formas.
Houbo tamén que aproveitou que estaba na carpa a caixa de correos para mandarlle a súa carta a Papá Noel, para que non se esqueza de traer os regalos dentro duns días.
Mentres os seus pais e nais conversaban no exterior da carpa foi pasando a tarde, ata que as sete e media do serán a compañía A Xanela do Maxín comezaba a representación do espectáculo de títeres O apalpador e a nena sen medo, que lle foi cantando a un público que non perdía detalle a lenda desta figura típica do nadal galego. Ollos abertos e cara de sorpresa en moitas caras, mentres todos degustaban os flocos de millo que lles ofrecía o concello.
Así transcorreu a primeira xornada da Festa de Nadal no Pino, que continúa hoxe a partir das catro da tarde con máis xogos tradicionais, un obradoiro para aprender a adornar a árbore de Nadal e, para aquelas persoas inscritas, participar no obradoiro de macramé.
O prato forte chegará despois das sete da tarde, co concerto de panxoliñas e o acendido das luces de Nadal que adornan a árbore da praza do Concello.
Máis fotos na páxina de Facebook do Concello do Pino (neste enlace)
