O Concello de O Pino celebrou hoxe o Día Internacional da Muller cunha ‘Andaina pola igualdade’ na que participou unha vintena de persoas, que fixeron a pé un tramo do Camiño de Santiago, dende o albergue Ponte de Ferreiros ata Pedrouzo, onde o alcalde leu un manifesto.
A través desta ‘Andaina polo igualdade’, unha iniciativa que conta coa colaboración do Pacto de Estado contra a Violencia de Xénero do Ministerio de Igualdade e que pretende axudar a erradicar esta lacra social, o Concello de O Pino amosa o seu compromiso coa igualdade, os dereitos fundamentais e a liberdade.
Por iso, no Día Internacional da Muller, o Concello comprometeuse a seguir impulsando políticas de igualdade desde o eido local, a contemplar as realidades específicas das mulleres na contorna, así como a facer visibles cada unha das desigualdades vixentes.
Do mesmo xeito, o Concello quere facer fincapé na educación en valores de igualdade de xénero, de solidariedade, así como ensinar o respecto ás persoas desde idades temperás para a construción dunha sociedade responsable e comprometida, unha sociedade que mostre o rexeitamento ante actitudes machistas que dificultan a consecución da igualdade real.
A ONU declarou en 1975 o 8 de marzo como o Día Internacional da Muller. Segundo indicou o alcalde na lectura do manifesto, a de hoxe é unha data reivindicativa coa que se fai visible a necesidade de seguir a reclamar aspectos básicos como a erradicación de violencias machistas, a igualdade salarial, a universalización dos coidados, etc. Unha data para por de manifesto que a equidade entre os xéneros é unha cuestión de interese público que engloba a toda a humanidade.
