Xogos, baile, taller de maquillaxe e de debuxo no polideportivo de Pedrouzo fixeron gozar onte a un cento de nenas e nenos do Pino durante a Festa de Nadal que rematou cunha grande chocolatada na casa da cultura e un final sorpresa que emocionou á maioría.
Os integrantes de Rivel Animación souberon facerse cun público esixente e con ganas de pasalo en grande durante a tarde do sábado. Os xogos colaborativos que montaron no pavillón de Pedrouzo e, sobre todo, co ‘vexo, vexo’ e cuns bailes nos que participaron a gran maioría porque se sabían a coreografía de memoria.
O taller de maquillaxe foi outra das propostas que espertou a curiosidade de nenos e nenas, que se achegaban a carpa para que lles pintaran a cara. Facianas de Spiderman, elefantes, bolboretas, cervos e algún que outro Avatar estiveron correndo e sorprendendo a moitos dos participantes, que remataron participando animadamente no taller de globoflexia.
Ata a concelleira Eva Varela lle pintaron a faciana como a dun coello, porque foi ela a encargada de contarlles o conto do ‘Coelliño aventureiro’ aos máis de noventa nenos participantes nesta iniciativa municipal. Todos sentados no chan escoitaban engaiolados as aventuras dun coelliño que se pasou a noite correndo dun lado para outro tentando coller unha luz que resultou ser unha estrela, e todo iso por non facerlle caso a súa nai. Este conto escribiullo Eva Varela a súa filla Sarai cando era pequena, e despois foi editado por Sotelo Blanco con ilustracións de Ana Santiso.
E ao rematar os xogos no polideportivo, nenas e nenos, moitos compañados dos seus familiares, desprazáronse ata á casa de cultura para degustar unha excelente chocolatada con biscoito e poder recuperar forzas despois de tanto correr e bailar. A festa rematou cunha sorpresa que deixou sorprendidos que moitos levaban xa tempo esperando.
Podes ver o album de fotos no Facebook do Concello, neste enlace
