O Concello do Pino celebrou hoxe a tradicional Xuntanza dos Maiores. A súa vixésimo terceira edición levouse a cabo na Capela da Magdalena, en Castrofeito, seguindo coa costume dos anos anteriores. Os concertos, a misa, o xantar e os xogos amenizaron unha xornada marcada polo bo tempo. Sen esquecer que Purificación Martínez, Abelardo Paz, Dolores Ben, Manuela Moscoso, Basilisa Suárez e Carmen Ferro recibiron a distinción conmemorativa deste ano por ser 6 dos veciños máis lonxevos do municipio.
Oitocentos maiores de O Pino déronse cita no mediodía de hoxe na Capela da Magdalena de Castrofeito para celebrar a súa xuntanza anual. O concerto da Banda de Música de Arca comezou unha intensa xornada que se extendeu ata as 19.30 horas, e que estivo acompañada polo bo tempo ata o último momento.
Pasadas as 13.00 horas iniciouse a multitudinaria misa de campaña, oficiada por Jesús Rial, quen celebrou cos veciños de O Pino os seus 50 anos da súa ordenación sacerdotal e que actualmente é o párroco de catro parroquias do municipio. De seguido procedeuse á esperada entrega de distincións conmemorativas a seis dos veciños máis lonxevos do concello. Este ano foi o turno de Purificación Martínez Ferro (Castrofeito), Abelardo Paz Fondevilla (Gradamil) e Dolores Ben Méndez (Arca), por nacer no ano 1925, mais a eles sumáronse Manuela Moscoso Cabaleiro e Basilisa Suárez Castiñeiras, ambas as dúas de Santa Irene e nadas en 1926. A celebración máis especial foi a do centenario que está a punto de cumprir Carmen Ferro Seijo, por iso ela tamén recibiu a súa homenaxe.
Este momento tan emotivo e especial abriu o apetito aos veciños de O Pino, que degustaron un menú preparado polo restaurante A Magdalena a base de empanada, troitas, pulpo e carne ao caldeiro. Gracias á música do Dúo Eva e Camilo, a sobremesa converteuse nunha troula para o recordo que, acompañada de xogos, deixou a todos os presentes con ganas de que chegue o ano que ven, para poder celebrar de novo esta xuntanza que xa é unha tradición.
