O manifesto institucional celebra os avances acadados e agradece o traballo de todas as mulleres que construíron a realidade que temos hoxe ||
O alcalde anima a manter o espírito de loita para que primen os valores e principios que garantan os dereitos fundamentais ||
O alcalde do Pino, Manuel Taboada, animou esta mañá a manter o espírito de “loita pola igualdade de dereitos e oportunidades entre homes e mulleres nunha sociedade máis xusta, na que primen os valores e principios que garantan os dereitos fundamentais”. Durante a lectura do manifesto institucional para conmemorar o Día Internacional da Muller, Taboada Vigo agradeceu o traballo de todas as mulleres que no pasado construíron en materia de igualdade a realidade coa que hoxe nos atopamos.
Nun mural instalado na entrada da casa consistorial para conmemorar o 8M destacan cualificativos como “valentes”, “loitadoras”, “emprendedoras” ou “compañeiras” referidos ás mulleres, para as que se reclama “respecto”.
Manuel Taboada leu o manifesto institucional do Concello do Pino polo 8M, no que se recoñecen os avances acadados ata o momento, e se afirma que “a igualdade efectiva en todos os aspectos da vida segue sendo unha meta por conseguir”. “Aínda hai moitos ámbitos, destacando os máis cotiás, nos que subsiste a discriminación, directa ou indirecta”, engade.
“A igualdade debe ser entendida como un indicador de prosperidade e avance social”, afirmou Taboada Vigo, que animou a “alonxarse dos estereotipos de xénero aínda existentes”.
Dende o Concello do Pino celebran os avances en materia de igualdade e recoñecen o traballo de todas as mulleres que construíron a realidade que nos atopamos. Pero este 8M debe ser tamén “un día de concienciación de que estamos ante unha loita inacabada”, e que debemos seguir construíndo unha sociedade que garanta os dereitos fundamentais de todas as mulleres “como cidadás que participan activamente de maneira equitativa na sociedade e tendo autonomía para tomar decisións no desenvolvemento da súa vida”.
Ademais da lectura do manifesto, o Concello do Pino colocou unha pancarta no balcón da casa consistorial e comeza unha campaña de sensibilización na que colabora o comercio local. Nos vindeiros días realizaranse diferentes actividades co alumnado do CPI Camiño de Santiago.
