Manuel Taboada e Hirofumi Matsuoka descubriron diante do centro sociocultural Luis Seoane o noveno fito desta ruta de peregrinación en Galicia ||
O alcalde resaltou que será “un símbolo de amizade entre Galicia e Xapón, e unha expresión dos profundos lazos que unen aos nosos pobos” ||
O presidente da asociación nipona agradeceu a hospitalidade do municipio e manifestou a súa vontade de estender esta iniciativa a outros concellos do Camiño Francés ||
O Concello do Pino reforzou hoxe os vínculos entre o Camiño Francés e a ruta xaponesa de peregrinación Shikoku Henro coa colocación dunha mouteira conmemorativa diante do centro sociocultural Luis Seoane, en Arca. O alcalde, Manuel Taboada, e o presidente da Asociación de Amigos do Camiño Shikoku Henro, Hirofumi Matsuoka, participaron no acto, que simboliza a amizade e o intercambio cultural entre Galicia e Xapón.
O novo fito, o noveno desta ruta nipona en Galicia, quedou instalado a carón da mouteira do Camiño Francés que sinala unha distancia de case 19,5 quilómetros ata Santiago de Compostela. No encontro participaron tamén integrantes do equipo de goberno municipal, a alcaldesa de Triacastela, Olga Iglesias, e os membros da delegación xaponesa que estes días visita Galicia. Ao seu paso polo lugar, varios peregrinos sumáronse á celebración con aplausos.
Durante a súa intervención, Manuel Taboada destacou o significado desta iniciativa como punto de encontro entre dous grandes itinerarios de peregrinación. “Será un símbolo de amizade entre Galicia e Xapón, e unha expresión dos profundos lazos que unen aos nosos pobos”, asegurou.
O rexedor salientou que, malia os miles de quilómetros que os separan, o Camiño de Santiago e o Shikoku Henro “están unidos por valores universais: a espiritualidade, o esforzo, a hospitalidade, o encontro entre culturas e a busca persoal que acompaña a todo peregrino”.
Pola súa banda, Hirofumi Matsuoka agradeceu a hospitalidade do Concello do Pino e lembrou que comezou a percorrer o Camiño de Santiago desde os Pireneos en 2006. En 2009 colocou en Molinaseca, en León, o primeiro fito do Shikoku Henro. A instalación da mouteira no Pino dá continuidade a este labor de achegamento entre ambas as rutas, que o ano pasado incluíu visitas a Melide e Arzúa.
Matsuoka avanzou tamén a súa intención de promover a colocación destes fitos en Monterroso e Pedrafita do Cebreiro, os dous municipios que, segundo explicou, quedan por incorporarse á iniciativa dentro da Mancomunidade de Concellos do Camiño Francés en Galicia.
O Shikoku Henro é unha ruta circular de aproximadamente 1.200 quilómetros que conecta 88 templos budistas na illa xaponesa de Shikoku. Vinculada á figura do monxe Kūkai, coñecido como Kobo Daishi, esta peregrinación mantén lazos de irmandamento co Camiño de Santiago. A nova mouteira de Arca contribúe a dar a coñecer este itinerario entre as persoas que percorren o Camiño Francés e reforza o papel do Pino como lugar de acollida e encontro entre culturas.
O alcalde do Pino, Manuel Taboada, co presidente da Asociación de Amigos do Camiño de Shikoku Henro (Xapón), Hirofumi Matsuoka
