Os menores que acudan disfrazados terán un agasallo especial ||
A xornada rematará coa música de Peque Disco Moc Moc ||
O Concello de O Pino celebra este domingo, 27 de febreiro, unha divertida Tarde de Entroido para que nenas e nenos poidan gozar das festas do carnaval. A actividade comezará ás 17:00 horas nunha carpa que se montará na praza do Concello e rematará coa música de Peque Disco Moc Moc.
A cativada, ademais de recibir unha sorpresa moi especial se vai disfrazada, poderá gozar cunha chea de actividades. Haberá obradoiros creativos, nos que farán complementos para o photocall, e tamén obradoiros participativos, onde nenas e nenos poderán facerse tatuaxes sobre a pel, maquillaxe de ollos e globoflexia. A diversión continuará con grandes xogos como a diana no chan, tres en liña, yenga, mikado e moitos máis.
Xa para rematar a xornada, a partir das 19.30 horas, a cativada moverá o esqueleto coa Peque Disco Moc Moc e gozará con xogos musicais, coreografías guiadas, números de clown, malabares pequenos con lume e moitas sorpresas máis.
